قىتايلىق ميللياردەر، Alibaba كومپانياسىنىڭ نەگىزىن قالاۋشى دجەك ما جارتى جىلدان بەرى توكيودا تۇرىپ جاتىر. بۇعان قىتايداعى قىسىم سەبەپ بولعان دەپ جازادى Financial Times.

باسىلىمنىڭ حابارلاۋىنشا، كاسىپكەر وتباسىمەن بىرگە توكيو قالاسىنىڭ ورتالىعىندا تۇرادى جانە بۇرىعىداي قوعامدىق ماسەلەلەرگە بەلسەندى ارالاسپايدى.

كاسىپكەر ءقازىر نەمەن اينالىسىپ جۇرگەنى تۋرالى ءتۇرلى اقپارات بار. بىرىندە ەلەكتروندىق كوممەرسيادان تىس ءوزىنىڭ كاسىبىن كەڭەيتىپ جاتقانى ايتىلسا، ەندى بىرىندك اكۆارەل بوياۋلارىمەن سۋرەت سالۋدى قولعا العانى حابارلانعان. 

ميللياردەردىڭ قىتايدان كەتۋىنە بيلىكتىڭ تەحنولوگيالىق كومپانياعا قىسىم جاساۋى سەبەپ بولعان. 2020 جىلى شانحايدا وتكەن كونفەرەنسيا كەزىندە شەنەۋنىكتەردى اشىق تۇردە سىنعا العاننان كەيىن كاسىپكەر ەل الدىنا سيرەك شىعا باستاعان. 

2021 جىلى ساۋىردە جۇڭگو نارىعىن رەتتەۋ جونىندەگى مەملەكەتتىك باسقارماسى Alibaba Group Holding Limited كومپانياسىنا "مونوپولياعا قارسى زاڭنامانى بۇزعانى ءۇشىن" 2،8 ميلليارد دوللار كولەمىندە ايىپپۇل سالعان. وسىنشا كوپ ايىپپۇل قىتايدا بۇرىن-سوڭدى ەشبىر كومپانياعا سالىنباعان.