الماتى وبلىسىنىڭ اكىمدىگى تالعار اۋدانىنا قاراستى بىرنەشە اۋىلدا گاز، جارىق، ورتالىقتاندىرىلعان سۋ بولماي قالعانىنا بايلانىستى پىكىر ءبىلدىردى.

وبلىس اكىمى باسپا ءسوز قىزمەتىنىڭ باسشىسى عالىمۇرات جۇكەلدىڭ ايتۋىنشا، ماگيسترالدىق گاز قۇبىرى قالپىنا كەلتىرىلگەن، ءقازىر ابونەنتتەردى كوگىلدىر وتىنعا قوسۋ جۇمىستارى جۇرگىزىلىپ جاتىر.

– پانفيلوۆ اۋىلىندا گاز قوسىلعان. گۇلدالا اۋىلىندا ابونەنتتەردىڭ 80%-نا كوگىلدىر وتىن بەرىلدى. تۇزدىباستاۋدا قاۋىپسىزدىك نورمالارىن ساقتاي وتىرىپ گازعا قوسۋ جۇمىستارى جۇرگىزىلۋدە. گاز كومپانيالارى تۇسكە دەيىن گازعا قوسۋ ءىسىن قالپىنا كەلتىرەتىنىنە كەپىلدىك بەردى، – دەدى عالىمۇرات جۇكەل.

اكىمدىكتەگىلەر ورتالىقتاندىرىلعان اۋىز سۋ مەن ەلەكتر ەنەرگياسىنىڭ وشۋىنە كەشە پانفيلوۆ اۋىلىندا ترانسفورماتورلىق قوسالقى ستانسيانىڭ جۇكتەمەسىنە بايلانىستى ەسەپتەگىش، رۋبيلنيك، ءبىرىنشى كوتەرگىشتىڭ تەرەڭدىك سورعىسى ورتەنگەنى سەبەپ بولدى دەپ وتىر.

– وسىعان بايلانىستى سۋ بەرۋ توقتاتىلدى. تالعار اۋدانىنىڭ «تالعار سۋ» مكك قىزمەتكەرلەرى سورعىنى اۋىستىرۋ بويىنشا جۇمىستار جۇرگىزدى. سونداي-اق اۋا-رايىنا بايلانىستى تۇزدىباستاۋ اۋىلىنداعى جەرۇيىق ىقشام اۋدانىندا 300 ءۇي جارىقسىز قالدى. ال گۇلدالا اۋىلىندا 1500 ءۇي ەلەكتردەن اجىراپ قالدى. قالپىنا كەلتىرۋ جۇمىستارى جۇرگىپ جاتىر، شامامەن 13:00 شاماسىندا ەلەكتر ەنەرگياسى بەرىلەدى، – دەيدى وبلىس اكىمى باسپا ءسوز قىزمەتىنىڭ باسشىسى.