الماتى قالاسى ءماسليحاتىنىڭ دەپۋتاتى، جۋرناليست سەرگەي پونوماريەۆ RAMS  كومپانياسى كەزەكتى ءتۇرعىن-ۇي كەشەنىنىڭ قۇرىلىسى ءۇشىن قالاداعى كوشەلەردىڭ ءبىرىن جاۋىپ تاستاعانىن ءمالىم ەتتى. دەپۋتاتتىڭ ايتۋىنشا، كومپانياعا ەكس-پرەزيدەنتتىڭ ءىنىسى بولات نازاربايەۆ قوجالىق ەتەدى.

دەپۋتات شاعىن كوشە ارقىلى بايتۇرسىنوۆ كوشەسىنەن ءال-فارابي داڭعىلىنا وڭاي شىعۋعا بولاتىنىن، بۇل – كولىك تىعىنى كەزىندە جولدى قىسقارتۋعا كومەكتەسەتىنىن اتاپ ءوتتى. ەندى قۇرىلىسقا بايلانىستى كوشە جابىق تۇر.

«الماتىدا تاعى ءبىر كوشە جوعالىپ كەتكەلى تۇر، بۇل – پوليتەحنيچەسكايا كوشەسى. انا جاقتى قورشاپ، RAMS كومپانياسى كەزەكتى نىسان سالىپ جاتىر. ءبىراق ءبىز جاڭا قازاقستاندى قۇرىپ جاتىرمىز ەمەس پە! ماعان باس جوسپارعا ساي، كوشە ورنىندا ءۇي تۇرۋى كەرەك دەيدى. ءبىز RAMS كومپانياسىنىڭ ۇستىنەن بولات نازاربايەۆ قارايتىنىن جاقسى بىلەمىز. ءقازىر ول ىقپالىن جوعالتتى عوي، باس جوسپاردى وزگەرتەيىك. مەن، ءماسليحات دەپۋتاتى رەتىندە گاز، ارحيتەكتۋرا، اۋداندىق اكىمدىك سەكىلدى وسىعان قاتىسى بار بارلىق قۇرىلىمدى جيناپ، كوشەنى جاپپاي، كەرىسىنشە جاڭالارىن اشۋعا جۇمىس ىستەۋگە شاقىرام. بۇعان دەيىن پوجارسكيي كوشەسىنەن ايىرىلىپ قالدىق، ەندى پوليتەحنيچەسكايانىڭ جوعالۋىنا جول بەرمەيىك، الماتىلىقتار" دەپ جازدى دەپۋتات جەلىدەگى پاراقشاسىندا.