قازاقستاندا تاعى ءبىر ساياسي پارتيا پايدا بولۋى مۇمكىن. ادىلەت مينيسترلىگى "حالىق دەربەستىگى" جاڭا پارتياسىن تىركەۋ – قۇجاتتاردى ساراپتاۋ ساتىسىندا ەكەنىن حابارلادى، دەپ جازدى كازتاگ اگەنتتىگى.

"بيىل "حالىق دەربەستىگى" ساياسي پارتياسىنان مەملەكەتتىك تىركەۋدەن ءوتۋ تۋرالى ءوتىنىش ءتۇستى، قازىرگى ۋاقىتتا قۇرىلتاي قۇجاتتارىنا ساراپتاما جۇرگىزىلۋدە" دەلىنگەن حابارلامادا.

ساياسي ۇيىم جەتەكشىسى ەكس-دەپۋتات، 2019، 2022 جىلعى پرەزيدەنت سايلاۋلارىندا كانديدات رەتىندە تىركەلمەك بولىپ، تىركەلە الماعان – جۇماتاي الييەۆ.

مينيسترلىك مالىمەتىنشە، جىل باسىنان بەرى 10 باستاماشىل توپتان پارتيا قۇرۋ تۋرالى حابارلاما كەلىپ تۇسكەن. ولاردىڭ تورتەۋىنە تىركەۋ بويىنشا كەلەسى كەزەڭ پروسەدۋرالارىن جۇزەگە اسىرۋعا رۇحسات بەرىلگەن.

كەلەسى كەزەڭگە جىبەرىلگەن باستاماشىل توپتىڭ ىشىندە "بايتاق" جۋىردا عانا رەسمي تۇردە پارتيا رەتىندە تىركەلدى. وزدەرىن ەكولوگيالىق ماسەلەلەردى كوتەرەتىن جاسىلدار پارتياسى رەتىندە تانىتىپ جۇرگەن ساياسي ۇيىم جەتەكشىسى ازاماتحان ءامىرتاي تىركەلگەننەن كەيىنگى باسپا ءسوز ءماسليحاتىندا "پرەزيدەنتكە ادىلەتتى قازاقستاندى بىرگە قۇرۋعا كومەكتەسەمىز" دەدى. تاۋەلسىز ساراپشىلار "بايتاق" ەلدە ساياسي رەفورما جۇزەگە اسىپ جاتقانىن كورسەتۋ ءۇشىن قۇرىلعان بيلىكشىل پارتيا، شىن مانىندە بۇل – ساياسي رەفورما يميتاسياسى عانا ەكەنىن ايتادى.

ال بيلىكتى، ۇكىمەتتىڭ جەكەلەگەن مۇشەلەرىن ءجيى سىنايتىن ساياساتانۋشى سانجار بوقايەۆتىڭ "نامىس" پارتياسى قۇرىلتاي وتكىزىپ، باستاماشىل توپتىڭ 700 مۇشەسىن جيناي المادى. ساياساتتانۋشى "قازاقستاندا پارتيا قۇرۋ ءۇشىن اكىمشىلىك كەدەرگىلەر كوپ، 700 مۇشە دەموكراتيالىق ەلدەر تۇرماق، كورشىلەس ەلدەردە جوق تالاپ" دەيدى.

وپپوزيسيالىق ساياساتكەر جاسارال قۋانىشالين باستاعان توپ وزدەرىنىڭ "العا، قازاقستان" پارتياسى باستاماشىل توبىن تىركەي الماي ءجۇر. ساياساتكەر بۇنى بيلىك ادەيى جاساپ وتىر دەسە، ادىلەت مينيسترلىگى بەلسەندىلەردىڭ قۇجاتىندا شيكىلىك بولعان سوڭ كەرىپ قايتاردىق دەيدى.

پارتيا قۇرۋ تۋرالى حابارلاما وتكىزگەن وزگە باستاماشىل توپتار تۋرالى اقپارات از.

بۇدان بولەك بيىل ساياساتكەر مۇحتار تايجان "جەر قورعانى"، كاسىپكەر بولات ءابىلوۆ "ءبىزدىڭ تاڭداۋ"، مارقۇم ساياساتكەر بالتاش تۇرسىمباي "ەل مەن جەر" پارتياسىن قۇراتىنىن تۋرالى مالىمدەگەن.

قازىرگى ۋاقىتتا پارتيانى تىركەۋ ءۇشىن باستاماشىل توپ مۇشەلەرىنىڭ سانى كەمى 700، پارتيا مۇشەسى 5 مىڭ، ايماقتىق بولىمشەلەردەگى مۇشە سانى كەمى 200 بولۋعا ءتيىس.