تالدىقورعان قوعامدىق كەڭەسىنىڭ كەزەكتى وتىرىسىندا قالاداعى ورتالىق كوشەلەردىڭ ءبىرى نازاربايەۆقا بۇرىنعى اتاۋىن قايتارۋ تۋرالى ماسەلە كوتەرىلدى. بۇل تۋرالى قوعامدىق كەڭەس باسپا ءسوز قىزمەتى حابارلادى.
قوعامدىق كەڭەس وتىرىسىنىڭ كۇن تارتىبىندە بىرنەشە ماسەلە قارالعان. سولاردىڭ قاتارىندا نازاربايەۆ كوشەسىنىڭ بۇرىنعى تاۋەلسىزدىك اتاۋىن قايتارۋ بويىنشا باستاما كوتەرىلىپ، جەتىسۋ وبلىسىنىڭ اكىمدىگى مەن وبلىستىق ءماسليحاتقا ءتيىستى حات جولدانعان.
بۇعان دەيىن جەتىسۋ وبلىسىنىڭ اكىمى بەيبىت يسابايەۆتىڭ جەرگىلىكتى تۇرعىندارمەن كەزدەسۋىندە بەلسەندى ازاماتتار قاڭتار وقيعاسى كەزىندە قۇلاعان ەكس-پرەزيدەنت نۇرسۇلتان نازاربايەۆ ەسكەرتكىشىنىڭ ورنىنا ۇلى اقىن اباي قۇنانبايەۆقا ارنالعان ەسكەرتكىش قويۋ، نازاربايەۆ كوشەسىن قايتادان تاۋەلسىزدىك دەپ اتاۋدى ۇسىنعان. اكىم حالىق پىكىرى ەسكەرىلەتىنىن ءمالىم ەتكەن.
2019 جىلى ن.نازاربايەۆ وكىلەتىن توقتاتىپ، مەملەكەت باسشىلىعى ق.توقايەۆقا وتكەن شاقتا ق.توقايەۆ رەسپۋبليكالىق ماڭىزى بار قالالار مەن وبلىس ورتالىقتارىنىڭ ورتالىق كوشەلەرى مەن داڭعىلدارىنا ەكس-پرەزيدەنتتىڭ اتىن بەرۋ تۋرالى تاپسىرما بەرگەن. تالدىقورعانداعى تاۋەلسىزدىك كوشەسى وسىلاي نازاربايەۆقا اۋىستىرىلدى.
ال تالدىقورعانداعى نازاربايەۆ ەسكەرتكىشى 2016 جىلى ورناتىلعان. ونى وبلىستىڭ سول كەزدەگى باسشىسى اماندىق باتالوۆ اشقان. ال 2022 جىلعى قاڭتار وقيعاسى كەزىندە جۇرتشىلىق ەسكەرتكىشتى قۇلاتىپ، سودەن بەرى ونى ەشكىم قايتا تۇرعىزبادى.
قاڭتار وقيعاسىنان كەيىن نازاربايەۆقا ەرەكشە وكىلەت بەرگەن تۇڭعىش پرەزيدەنت تۋرالى زاڭ كۇشىن جويىپ، ەلوردا اتاۋى نۇر-سۇلتاننان استاناعا اۋىستى. بۇرىن ەكس-پرەزيدەنتتى ماقتاعان كەي ادامدار ءقازىر ودان تەرىس اينالىپ، ساياساتىن سىناپ ءجۇر.
پىكىر قالدىرۋ