ۋكراينا پرەزيدەنتى ۆلاديمير زەلەنسكيي اقش-قا جاساعان ساپارى كەزىندە كونگرەسس وتىرىسىنا قاتىستى. زەلەنسكيي اقش-تىڭ رەسەي اسكەرىنە قارسى كۇرەسى مەن ۋكرايناعا جاساعان كومەگىن قايىرىمدىلىق ەمەس، الەمدىك قاۋىپسىزدىكتى ساقتاۋ ءۇشىن جاسالعان ينۆەستيسيا دەپ باعالايتىنىن اتاپ ءوتتى، دەپ جازادى Reuters.

"مەن ءۇشىن اقش-تىڭ كونگرەسسىنە قاتىسۋ، سىزدەردىڭ جانە بۇكىل امەريكالىقتاردىڭ الدىندا ءسوز سويلەۋ – ۇلكەن ابىروي. بارلىق قيىندىقتارعا قاراماستان ۋكراينا قۇلاعان جوق. ۋكراينا ءدىن امان"، – دەدى زەلەنسكيي.

كونگرەسسكە قاتىسقان شەنەۋنىكتەر مەن سەناتورلار زەلەنسكييگە قولداۋ ءبىلدىرىپ، قول سوعۋ ءۇشىن بىرنەشە رەت ورىندارىنان تۇردى. مىسالى، پرەزيدەنتتىڭ "ۋكراينا سوڭىنا دەيىن شەكاراسى ءۇشىن كۇرەسىپ، ەشقاشان بەرىلمەيدى" دەپ ايتقان ءسوزى جانە قازىرگى سوعىستى ەكىنشى دۇنيەجۇزىلىك سوعىسپەن سالىستىرۋى قاتىسۋشىلاردى قاتتى اسەرلەندىردى.

Reuters اگەنتتىگىنىڭ حابارلاۋىنشا، الداعى ۋاقىتتا بەيبىت كەلىسسوزدەردىڭ نىشانى بايقالمايدى. رەسەي دە، ۋكراينا دا سوعىستى جالعاستىرۋعا دايىن ەكەنىن ءمالىم ەتكەن.

ۆلاديمير زەلەنسكيي دجو بايدەنمەن 10 تارماقتان تۇراتىن ۋكراينالىق "بەيبىتشىلىك فورمۋلاسىن" تالقىلاعانىن جەتكىزدى. 

"بايدەن ءبىزدىڭ بەيبىتشىلىك جونىندەگى باستامامىزدى قولداپ جاتقانىنا قۋانىشتىمىن. بۇل جيىنداعى ءاربىر قاتىسۋشى باستاماعا ۇلەسىن قوسا الادى"، دەدى ۋكراينا پرەزيدەنتى. 

ۆلاديمير زەلەنسكيي كونگرەسستە ۋكرايناعا ەكىجاقتى قولداۋدىڭ الداعى ۋاقىتتا دا جالعاساتىنىنا ءۇمىتتى ەكەنىن ايتىپ ءوتتى.