ازاماتتىق پوزيسياسىن بەلسەندى ءبىلدىرىپ جۇرگەن ءبىر توپ ازامات "6 قاڭتار" دەگەن اتپەن تاۋەلسىز بلوك قۇراتىنىن، الداعى ءماجىلىس سايلاۋىنا قاتىساتىنىن جاريالادى.
ولاردىڭ قاتارىندا جۋرناليستەر دۋمان مۇحامەتكارىم مەن دينارا ەگەۋبايەۆا، ازاماتتىق بەلسەندىلەر ءالنۇر ىلياشيەۆ پەن ارايلىم نازار بار.
"قازاقستاندا ادام قۇقىعى ءجيى بۇزىلاتىنىنا دەگەن نارازىلىق باسىمىزدى بىرىكتىردى" دەگەن بەلسەندىلەر ساياساتپەن ەتەنە ارالاسۋعا شەشىم قابىلداعانىن ايتادى.
دينارا ەگەۋبايەۆا بيلىك ازاماتتىق قوعام ءۇنىن ەستيمەيتىندىكتەن بيلىككە جاقىنداۋعا تۋرا كەلىپ وتىرعانىن اتاپ ءوتىپ، سول ءۇشىن ءبىر وكرۋگتىك مانداتتان الداعى ءماجىلىس سايلاۋىنا تۇسەتىنىن ءمالىم ەتتى. قۇرىپ جاتقان "التىنشى قاڭتار" بلوگىنا وزگە دە ازاماتتاردى قوسىلۋعا شاقىردى.
دۋمان مۇحامەتكارىم ارىپتەسىنىڭ ءسوزىن جالعاي وتىرىپ، ايماقتاردا بلوكقا قوسىلام دەۋشىلەر بارىن، سولاردىڭ قاتارىندا جۋرناليست لۇحپان احمەدياروۆ باتىس قازاقستان وبلىسىنان سايلاۋعا تۇسۋگە نيەتتى ەكەنىن جەتكىزگەنىن ايتتى. سونداي-اق ول سايلاۋ ءادىل وتسە، وزدەرىنىڭ وكرۋگىنەن جەڭىپ شىعاتىنىنا سەنىمدى ەكەنىن قوسا كەتتى.
ءالنۇر ىلياشيەۆ ساياسي دوداعا قاتىسىپ، كانديداتۋراسىن ۇسىنعىسى كەلەتىندەر بولسا، قۇقىقتىق، كونسۋلتاتۆتىك قولداۋ كورسەتۋگە دايىن ەكەنىن دە تىلگە تيەك ەتتى.
پىكىر قالدىرۋ