27 جەلتوقسان كۇنى بۇقتىرىلعان ەت ونىمدەرىن شىعاراتىن "كۋبلەي" سوتىنا قاتىستى ىستە سۋديا شەشىم شىعارۋى مۇمكىن. وسىعان بايلانىستى زاۋىتتا جۇمىس ىستەيتىن قىزمەتكەرلەر ۋايىمداپ وتىرعاندارىن ايتادى.

"قورقىنىش دەگەن بىزدە ۇلكەن. وسىنى ەستىگەننەن بەرى ۇرەيگە تۇستىك. مەنىڭ بۇل جەردە جۇمىس ىستەپ جاتقانىما 20 جىلداي ۋاقىت بولدى. جاپ-جاس بولىپ "كۋبلەي" زاۋىتىنا كىردىك، بالالارىمىزدى وسىردىك، ۇيلەندىردىك، ءۇي سالدىق. بالا-شاعامىزدى وسى جۇمىستىڭ ارقاسىندا اسىراپ وتىرمىز. ەرتەڭ بۇل زاۋىت جابىلسا، قايدا بارامىز، قالاي كۇن كورەمىز. بىلمەيمىن"،- دەدى كۋبلەي زاۋىتىنىڭ جۇمىسشىسى الۋان امانگەلدى قىزى.

الۋاننىڭ ارىپتەستەرىنىڭ بارلىعى وسىنداي ەكى ۇدايى كۇيدە، ۋايىممەن وتىرعاندارىن جەتكىزدى.

ەستەرىڭىزگە سالا كەتەيىك، "كۋبلەي" زاۋىتى مەن ورال قالاسى اكىمدىگىنىڭ اراسىندا داۋ جەرگە قاتىستى باستالعان بولاتىن. سەبەبى، ورال قالاسىنىڭ اكىمدىگى "كۋبلەي" زاۋىتىنىڭ اۋماعىنان تۇرعىن ءۇي سالۋعا جەر بەرىپ، ول جەرگە ۇيلەر سالىنىپ، ءقازىر قالعان قۇرىلىس توقتاپ تۇر. بۇل جەردە سول تۇرعىن ۇيگە قاراجاتتارىن سالعان ۇلەسكەرلەر دە زارداپ شەگۋدە. ەگەر، سول سالىنعان ۇيلەرگە حالىق قونىستاناتىن بولسا، "كۋبلەي" زاۋىتى جابىلۋى مۇمكىن. سەبەبى، زاۋىتتىڭ سانيتارلىق تالاپتارى ساقتالماۋدا. زاڭعا سايكەس، زاۋىت، كاسىپورىندار تۇرعىن ۇيلەردەن 100 مەتر الىس جەردە ورنالاسۋى ءتيىس. دەمەك، بۇقتىرىلعان ەت شىعاراتىن زاۋىتقا ەرتەڭگى كۇنى تۇرعىندار تاراپىنان جاعىمسىز ءيىسى شىقتى دەگەن سىندى ءتۇرلى شاعىم ءتۇسۋى مۇمكىن.

سوت ەكى تاراپ ىرماعا كەلۋى كەرەك دەپ شەشىم شىعارعان بولاتىن. سوت وسى شەشىمدى وقي سالىسىمەن زالداعىلار ۋ-شۋ بولىپ، ءتىپتى تۇرعىننىڭ ءبىرى تالىپ قالعان بولاتىن. سەبەبى، مەدياسياعا ەكى تاراپ تا قارسى بولدى، سۋديا جۇرابايەۆ "كۋبلەي" مەن ورال قالاسى اكىمدىگى اراسىنداعى ءىستى توقتاتىپ قويىپ، جەلتوقساننىڭ 22 كۇنى ءىس قايتا جالعاستى.

"ءبىز تۇرعىندارمەن سوتتاسىپ جاتقان جوقپىز. ءبىز وسىنداي زاڭسىزدىققا بارعان اكىمدىكتەگىلەرمەن سوتتاسىپ جاتىرمىز. اكىمدىكتەن كەلگەن وكىلدەر زاڭ "كۋبلەي" زاۋىتىنىڭ جاعىندا ەكەنىن ءتۇسىنىپ وتىر. ولار ءبىز وسى سوت بىتكەننەن كەيىن باتىس قازاقستان وبلىسىنىڭ اكىمى يسقالييەۆتى قىلمىستىق جاۋاپكەرشىلىككە تارتۋ جونىندە سۇراقتى كوتەرەتىنىمىزدى سەزەدى. سونىمەن قاتار قىلمىستىق جاۋاپكەرشىلىككە بقو اكىمى اپپاراتىنىڭ باسشىسى ابات شىنىبەكوۆتى دە تارتۋ ماسەلەسىن كوتەرەمىز. سەبەبى، ول قۇجاتقا قول قويعان. زاڭسىز جوبانى جاساپ، قول قويعانداردىڭ بارلىعى جاۋاپكەرشىلىككە تارتىلۋى كەرەك"،- دەدى "كۋبلەي" زاۋىتىنىڭ زاڭدى وكىلى باقىتجان بازاربەك.

ءساۋىر ايىندا يندۋستريا مينيسترلىگىنىڭ ءوزى ورال اكىمدىگى باس جوسپاردى ساقتاۋى كەرەك. كۋبلەي زاۋىتىنىڭ ماڭىندا تۇرعىن ءۇي سالۋعا بولمايدى دەپ جاۋاپ بەرگەن. ءبىراق سوعان قاراماستان ءىستى سوزباققا سالىپ، ۇكىمەتتىڭ ۇستانىمىن بىلمەك بولىپ، قۇجاتتى ۇكىمەتكە قايتا جىبەرگەن. ءقازىر "كۋبلەي" زاۋىتىنىڭ زاڭدى قورعاۋشىسى، ادۆوكات سۋديا شەشىم شىعارۋعا قورقىپ وتىر ما دەگەن كۇمانعا كەلە باستادى.

ايتا كەتەيىك، بۇقتىرىلعان ەت ونىمدەرىن شىعاراتىن كۋبلەي زاۋىتىندا 700 ادام جۇمىس ىستەيدى، ونىڭ سىرتىندا وسى كاسىپورىنعا ەتتەرىن وتكىزىپ وتىرعان 3 مىڭعا جۋىق شارۋا يەسى تاعى بار. بارلىعى تاقىمىن قىسىپ، سوتتىڭ ءادىل شەشىمىن شىعارعانىن كۇتىپ وتىر.