رەسەيلىك RBK باسىلىمى ەكس-پرەزيدەنت نۇرسۇلتان نازاربايەۆ ءۇشىن ەلباسى ستاتۋسىنان ايىرىلۋ نەنى بىلدىرەدى دەگەن ساۋالعا جاۋاپ ىزدەپ، ءبىرقاتار ساراپشىنى سوزگە تارتقان.
ە.م. پريماكوۆ اتىنداعى الەمدىك ەكونوميكا مەن حالىقارالىق قاتىناستار بويىنشا رەسەي ۇلتتىق زەرتتەۋ ينستيتۋتىنىڭ اعا عىلىمي قىزمەتكەرى ستانيسلاۆ پريچين "قازىرگى پرەزيدەنت بيلىكتەن بۇرىنعى ەليتانى الاستاتۋعا تىرىسىپ جاتىر، ەلباسى تۋرالى زاڭنىڭ كۇشىن جويۋ توقايەۆ پەن نازاربايەۆ توبى اراسىنداعى استىرتىن تەكەتىرەستى كورسەتەدى" دەگەن پىكىردە.
ساراپشى نازاربايەۆتىڭ ۇلكەن ساياساتقا ورالۋ مۇمكىندىگى جوعىن، ونىڭ ەندىگى مىندەتى كلانىنىڭ مۇددەسىن قامتاماسىز ەتۋ ەكەنىن ايتادى.
پريچين نازاربايەۆ 2020 جىلعى قاڭتارعا دەيىنگى كەزەڭگە قاراعاندا جەتەكشى ويىنشى ەمەس، ءبىراق ساياسي، ەكونوميكالىق الاڭدا ءىرى فيگۋرا دەپ سانايدى.
ورتالىق ازيا بويىنشا ەكسپەرت اركاديي دۋبنوۆتىڭ پىكىرىنشە، نازاربايەۆ تاۋەلسىز قازاقستان سيمۆولدارىنىڭ ءبىرى رەتىندە قالۋعا تىرىسادى، ءارى سولاي بولادى دا. ءبىراق ول تاۋەلسىز قازاقستاننىڭ نەگىزىن قالاعانداردىڭ ءبىرى رەتىندە اتالعانىمەن، قىتايدا ماو سزەدۋندى، سولتۇستىك كورەيادا كيم ير سەندى ۇلىقتاعانداي، ونى ۇلىقتاۋ اڭعارىلمايدى.
اركاديي دۋبنوۆ سونداي-اق نازاربايەۆتى وزىنە بەرىلگەن ارتىقشىلىقتان بىرتىندەپ ايىرۋ قاڭتارداعى تارتىپسىزدىكتەر بويىنشا سوت پروسەسىنە اكەلەتىن قادام بولىپ شىعۋى عاجاپ ەمەس دەگەن ويدا.
پىكىر قالدىرۋ