وپپوزيسيالىق ساياساتكەر، تىركەلمەگەن دەموكراتيالىق پارتيانىڭ جەتەكشىسى جانبولات مامايعا جاڭا ايىپ تاعىلۋى مۇمكىن. بۇل تۋرالى ونىڭ زايىبى قۇقىققورعاۋشى، جۋرناليست ينگا يمانباي حابارلادى.
"مەملەكەتتىك ايىپتاۋشى ەركىن بايماعامبەتوۆ سوتتان جانبولات مامايعا جاڭا ايىپ تاعۋ ءۇشىن ۋاقىت سۇرادى. ياعني، ۇكىمەت جازىقسىز جاندى بوساتۋدىڭ ورنىنا، كەرىسىنشە، ونىڭ جاعدايىن ودان ءارى ۋشىقتىرۋ ءۇشىن بارىن سالۋدا. پروكۋروردىڭ ايتۋىنشا، مۇنداي شەشىمگە ساراپشى روزا اكباروۆانىڭ قورىتىندىسى مەن ايىپتاۋ تاراپى كۋاگەرلەرىنىڭ بەرگەن جاۋاپتارى سەبەپ بولعان. ءبىز جانبولات مامايدىڭ جازىقسىز ەكەنىن جانە وعان تاعىلعان ايىپتاردىڭ جالعان جالا ەكەنىن، ونى قۋدالاۋدىڭ ساياسي استارى بار ەكەنىن قايتالاپ ايتامىز" دەدى ينگا يمانباي facebook پاراقشاسىندا.
جانبولات ماماي بىلتىر اقپان ايىندا قاڭتار وقيعاسىنىڭ 40 كۇندىگىنە وراي وتكەن قارالى ميتينگتەن كەيىن ۇزاماي ۇستالىپ، قاراشاعا دەيىن تەرگەۋ يزولياتورىندا قاماۋدا وتىرعان. وعان و باستا جاپپاي تارتىپسىزدىك ۇيىمداستىردى، پوليسياعا ءتىل تيگىزدى، جالعان اقپارات تاراتتى دەگەن ايىپتار تاعىلعان. قازان ايىنىڭ سوڭىندا جاپپاي تارتىپسىزدىك ۇيىمداستىردى دەگەن ايىپ بەيبىت جيىن وتكىزۋ ءتارتىبىن بۇزدى دەگەن جەڭىلىرەك ايىپقا اۋىستىرىلعانى بەلگىلى بولدى. ال 2 قاراشا كۇنى سوت وعان قاتىستى بۇلتارتپاۋ شاراسىن وزگەرتىپ، تەرگەۋ يزولياتورىنان ءۇيقاماققا جىبەرگەن. سودان بەرگى سوت وتىرىستارى الدەنەشە رەت كەيىنگە قالدىرىلعان.
پىكىر قالدىرۋ