ناۋرىز ايىنان باستاپ قازاقستاندىقتار وزدەرىن بانكروت دەپ جاريالاي الادى. بۇل تۋرالى پرەمەر-مينيستر ورىنباسارى – قارجى ءمينيسترى ەرۇلان جاماۋبايەۆ مالىمدەدى.
"2022 جىلعى 30 جەلتوقساندا "قازاقستان رەسپۋبليكاسى ازاماتتارىنىڭ تولەم قابىلەتتىلىگىن جانە بانكروتتىعىن قالپىنا كەلتىرۋ تۋرالى" زاڭعا قول قويىلدى. زاڭ 1 قاڭتاردا رەسمي تۇردە جاريالاندى. بانكروتتىق تۋرالى وتىنىشتەردى قابىلداۋ 3 ناۋرىزدان باستالادى"، - دەدى ەرۇلان جاماۋبايەۆ.
حالىقارالىق تاجىريەبەگە ساي بانكروتتىق ءراسىم 3 باعىت بويىنشا جۇزەگە اسادى.
- سوتتان تىس بانكروتتىق؛
- سوت ارقىلى بانكروتتىق؛
- قابىلەتتىلىگىن قالپىنا كەلتىرۋ.
سوتتان تىس بانكروتتىق ءراسىمدى بانكتەر، ميكروقارجى ۇيىمدارى جانە كوللەكتورلىق اگەنتتىكتەر الدىنداعى قارىزدار بويىنشا قولدانۋعا بولادى.
الايدا تومەندەگى شارتتار ساقتالۋى ءتيىس:
-
بورىش 5،5 ملن تەڭگەدەن (1600 اەك) اسپايدى؛
- كرەديت 12 اي بويى وتەلمەگەن بولسا؛
-
مەنشىگىندە تىركەلگەن مۇلىك، ونىڭ ىشىندە ورتاق مەنشىكتەگى مۇلىك بولماعان جاعدايدا؛
-
بانكپەن رەتتەۋ جۇرگىزىلۋ كەرەك.
ەكىنشى ءراسىم – سوت بانكروتتىعى. سوت بانكروتتىعىنىڭ ماقساتى – بانكروتتىڭ مۇلىكتىك ماسساسى ەسەبىنەن كرەديتورلاردىڭ تالاپتارىن بارىنشا قاناعاتتاندىرۋ. بۇل ءراسىمدى قارجى باسقارۋشىلارى جۇزەگە اسىرادى، ولاردىڭ قۇرامىنا جۇمىس ىستەپ تۇرعان اكىمشىلەر، كاسىبي بۋحگالتەرلەر، زاڭ كەڭەسشىلەرى مەن اۋديتورلار كىرەدى.
ءۇشىنشى ءراسىم، بۇل – تولەم قابىلەتتىلىگىن قالپىنا كەلتىرۋ، وندا سوت ارقىلى بورىشتى ءبولىپ-بولىپ تولەۋ (5 جىلعا دەيىن) مۇمكىندىگى كوزدەلەدى. ونىڭ ارتىقشىلىعى - ازامات "بانكروت" دەپ سانالمايدى. دەمەك، بانكروت ءۇشىن كوزدەلگەن سالدارلار وعان قولدانىلمايدى.
"زاڭ كۇشىنە ەنگەننەن كەيىن ازاماتتاردىڭ دا جاۋاپكەرشىلىگى ارتادى. الداعى ۋاقىتتا جىلدام قارىز الۋ ءۇشىن كرەديت تاريحىنىڭ دۇرىس بولۋىنا ازاماتتاردىڭ وزدەرى مۇددەلى بولۋى ءتيىس. بانكروت دەپ مويىنداۋ قارىزداردى تولەمەي كەتۋ ەمەس، تەك شاراسىز جاعدايداعى كومەك ەكەنىن اركىم ءبىلۋى كەرەك" دەپ قورىتىندىلادى مينيستر.
پىكىر قالدىرۋ