اقپارات جانە قوعامدىق دامۋ ءمينيسترى دارحان ءقىدىرالى الماتىدا جۇمىس ساپارىمەن بولىپ قايتتى.
مينيستر الدىمەن سايت جەتەكشىلەرى جانە بلوگەرلەرمەن كەزدەسىپ، ينتەرنەت-جارناما جانە ونلاين پلاتفورمالار تۋرالى زاڭ جوباسى ازىرلەنىپ جاتقانىن ايتتى.
– بۇل زاڭ جوباسى شەڭبەرىندە قولدانۋشىلاردىڭ جاۋاپكەرشىلىگى كۇشەيەدى. شەتەلدىك پلاتفورمالاردىڭ قىزمەتى قازاقستاندىق زاڭناماعا سايكەس رەتتەلەدى. الەۋمەتتىك جەلى يەلەرى ءوز ينتەرفەيسىن قازاقستاندىقتار ءۇشىن مەملەكەتتىك تىلدە ۇسىنۋعا مىندەتتەلەدى. اقپاراتقا قول جەتكىزۋ ماسەلەلەرى جونىندەگى زاڭعا تۇزەتۋلەر ازىرلەندى. ۇسىنىلعان وزگەرىستەر، ازاماتتاردىڭ اقپاراتقا قول جەتكىزۋ قۇقىعىن زاڭسىز شەكتەگەن مەملەكەتتىك ورگانداردىڭ جاۋاپكەرشىلىگىن كۇشەيتەدى، – دەدى مينيستر.
بۇعان قوسا، مينيستر قازىرگى ۋاقىتتا ءداستۇرلى باق-تىڭ باعىتى كونسەپتۋالدى تۇرعىدا وزگەرىپ جاتقانىن، سوندىقتان مينيسترلىك مەديا زاڭنامانىڭ جاڭا جوباسى جۇرتشىلىق نازارىنا ۇسىنىلعانىن جانە ونى بەلسەندى تالقىلاۋعا شاقىردى.
دارحان ءقىدىرالى اڭگىمە بارىسىندا ارىپتەستەرىنە جالعان اقپاراتتىڭ تارالماۋىنا مۇقيات قاراپ، كونتەنت ساپاسىنا ءمان بەرۋدى سۇرادى.
ەركىن فورماتتا وتكەن كەزدەسۋدە الماتىلىق كونتەنت جاساۋشىلار مينيسترگە ساۋالدارىن قويىپ، ءوز پىكىرلەرىن ورتاعا سالدى.
مۇنان سوڭ مينيستر جۇمىس ساپارى اياسىندا «نۇر-مۇباراك» ەگيپەت يسلام مادەنيەتى ۋنيۆەرسيتەتىنىڭ ۇجىممەن كەزدەستى. مينيستر اۋەلى ۋنيۆەرسيتەتتىڭ 4000 ورىنعا ارنالعان جاڭا عيماراتىنىڭ قۇرىلىسىمەن تانىستى.
«نۇر-مۇباراك» ەگيپەت يسلام مادەنيەتى ۋنيۆەرسيتەتى – زايىرلى مەملەكەت تالاپتارىنا جاۋاپ بەرەتىن، ءدىن سالاسىندا بىلىكتى كادرلاردى دايارلايتىن جوعارى وقۋ ورنى. بۇگىندە تۇلەكتەردىڭ باسىم بولىگى ۋنيۆەرسيتەتتەردە، مەدرەسە-كوللەدجدەردە ۇستاز بولىپ، مەشىتتەردە نايب يمام رەتىندە، وڭىرلىك ءدىن ىستەرى باسقارمالارىنىڭ ءدىن ماسەلەلەرىن زەرتتەۋ ورتالىقتارىندا ينسپەكتور جانە تەولوگ بولىپ قىزمەت ەتىپ ءجۇر.
كەزدەسۋدە ءدىني كادرلاردى دايارلاۋعا قاتىستى ءبىرشاما ماسەلە تالقىلاندى.
سونىمەن بىرگە مينيستر ۋنيۆەرسيتەت كىتاپحاناسىنا «كونە تۇركى تىلىنە اۋدارىلعان العاشقى قۇران» كىتابىن تابىستادى. اتالعان كىتاپ ح عاسىردا ءتارجىمالانعان.
ءىس-شاراعا قمبد باس ءمۇفتيى ناۋرىزباي قاجى تاعان ۇلى، ۋنيۆەرسيتەت رەكتورى مۇحامماد ءاش-شاححات ءال-جيندي جانە ۇستازدار قاتىستى.
"قازاق گازەتتەرى" قايتا قۇرىلدى
اقپارات جانە قوعامدىق دامۋ ءمينيسترى دارحان ءقىدىرالىنىڭ الماتىداعى جۇمىس ساپارى "قازاق گازەتتەرى" ۇجىمىمەن كەزدەسۋمەن جالعاستى.
جاقىندا عانا قايتا جاساقتالعان ۇجىم قۇرامىنا «ەگەمەن قازاقستان»، «كازاحستانسكايا پراۆدا»، «انا ءتىلى»، «اقيقات»، «مىسل»، «تەڭگە مونيتور»، «ۇيعىر اۆازي»، «ۇركەر»، «اقجەلكەن»، «بالدىرعان»، «ۇلان»، «درۋجنىە رەبياتا» باسىلىمدارى كىرەدى.
كەزدەسۋ بارىسىندا ەكى ۇجىمنىڭ بىرىگۋىنە وراي دۋمان اناش «قازاق گازەتتەرى" باس ديرەكتوردىڭ ورىنباسارى – الماتى فيليالىنىڭ باسشىسى، ەرلان ءجۇنىس "انا ءتىلى" گازەتىنىڭ باس رەداكتورى جانە اسىل ساعىمبەكوۆ «مىسل» جۋرنالىنىڭ باس رەداكتورى بولىپ تاعايىندالعانى ايتىلدى.
مينيستر ءوز وتىنىشتەرى بويىنشا جۇمىستان بوساعان بەلگىلى قالامگەرلەر شامشيددين پاتتەيەۆ پەن قالي سارسەنبايعا جەمىستى ەڭبەكتەرى ءۇشىن العىس ايتىپ، ارنايى سالالىق مەدالدارمەن ماراپاتتادى.
جيىن قورىتىندىسىندا د.ءقىدىرالى جۋىردا عانا جاڭا عيماراتقا كوشكەن ۇجىم قىزمەتكەرلەرىنىڭ جالاقاسى وسكەنىن، قالاماقى مەن سىيلىقاقى كوتەرىلگەنىن ايتتى. سونداي-اق جاڭا باسشىلىق الدىنا ءتيىستى مىندەتتەر قويدى.
ارتىنشا مينيستر «قازاق گازەتتەرى» سەرىكتەستىگىنە قاراستى «درۋجنىە رەبياتا» ۇجىمىن 90 جىلدىق مەرەيتويمەن قۇتتىقتادى.
– 90 جىل بويى بالاپاندارىمىزدى قۋانتىپ، تانىمدىق-تاعىلىمدىق اقپاراتتارىمەن سۋسىنداتىپ جۇرگەن «درۋجنىە رەبياتا» باسىلىمىن مەرەيتويىمەن قۇتتىقتايمىن. جاس ۇرپاقتى تاربيەلەۋ جولىندا اتقارىپ جۇرگەن قىزمەتتەرىڭىزدىڭ جەمىسىن كورە بەرىڭىزدەر! گازەت وسى ۋاقىت ارالىعىندا كوپتەگەن تاريحي وقيعانىڭ كۋاسى بولدى جانە ولارعا بالالار كوزىمەن قاراي ءبىلدى. رەداكسيا بۇگىنگە دەيىن ءوزىنىڭ باستى ميسسياسى – وسكەلەڭ ۇرپاقتى شىعارماشىلىققا، ءوز ەلىنە دەگەن سۇيىسپەنشىلىككە جانە اعا بۋىنعا دەگەن قۇرمەتكە تاربيەلەۋ ءىسىن تولىق اتقارىپ كەلەدى. بالالار باسپا باسىلىمدارىنىڭ دامۋىنا قوسقان ۇلەسى ءۇشىن "درۋجنىە رەبياتا" گازەتىنە العىسىمدى بىلدىرەمىن!، – دەدى مينيستر.
جيىن سوڭىندا د.ءقىدىرالى باسىلىمداعى ءبىرقاتار قىزمەتكەردى سالالىق ماراپاتتارمەن ماراپاتتادى.
اقپارات جانە قوعامدىق دامۋ ءمينيسترى الماتىداعى جۇمىس ساپارىن «اlmaty» تەلەارناسىنىڭ ۇجىمىمەن كەزدەسۋمەن تۇيىندەدى.
مينيستر 2022 جىلدان باستاپ رەسپۋبليكالىق مارتەبەگە يە بولىپ، ەلىمىزدىڭ بارلىق ايماعىنا تارالاتىن ارنانىڭ جۇمىسىمەن تانىسىپ، ارىپتەستەرمەن وي-پىكىر الماستى.
د.ءقىدىرالى اقپارات سالاسىنداعى نەگىزگى ماسەلەلەر مەن جاڭالىقتارعا توقتالىپ، ماسس-مەديا تۋرالى زاڭ جوباسىنىڭ جۋرناليستەرگە بەرەتىن ارتىقشىلىقتارىن اتاپ ءوتتى.
كەزدەسۋ سوڭىندا مينيستر تەلەارنا قىزمەتكەرلەرىنىڭ سۇراقتارىنا جاۋاپ بەرىپ، جۇمىستارىنا ساتتىلىك تىلەدى.
اقپارات جانە قوعامدىق دامۋ مينيسترلىگىنىڭ باسپا ءسوز قىزمەتى
