تۇركىستان وبلىسى پوليسيا دەپارتامەنتى 15 جاستاعى قىزدى الىپ قاشۋ وقيعاسىنا قاتىستى سوتقا دەيىنگى تەرگەۋ جۇمىستارى باستالعانىن حابارلادى.
"شىمكەنت تۇرعىنىنىڭ كامەلەتكە تولماعان قىزىن ۇيلەنۋ ماقساتىندا الىپ قاشقانى تۋرالى ارىزى بويىنشا، جەتىساي اۋدانىنىڭ پوليسياسى ق ر قىلمىستىق كودەكسىنىڭ 122-بابىمەن (ون التى جاسقا تولماعان اداممەن جىنىستىق قاتىناس نەمەسە سەكسۋالدىق سيپاتتاعى وزگە دە ارەكەتتەر جاساۋ) سوتقا دەيىنگى تەرگەپ-تەكسەرۋدى باستادى. قازىرگى كەزدە ءتيىستى ساراپتاما تاعايىندالدى. قاجەتتى تەرگەۋ ارەكەتتەرى جۇرگىزىلىپ جاتىر. ءىس تۇركىستان وبلىسى پد باقىلاۋىنا الىندى"، دەلىنگەن ۆەدومستۆا حابارلاماسىندا.
بۇعان دەيىن نەمولچي قورىنىڭ جەتەكشىسى دينا ءتاڭسارى جەتىسايدا 15 جاستاعى قىزدى الىپ قاشقانى تۋرالى اقپارات جاريالاعان. بەلگىلى بولعانداي، قىزدىڭ اناسى الىپ قاشقانداردان قالىڭ مال رەتىندە 600 مىڭ تەڭگە الىپ، ولارعا كەشىرىم بەرگەن. اتالعان جاعدايدى الەۋمەتتىك جەلى ارقىلى ەستىگەن قىزدىڭ اكەسى پوليسياعا ارىزدانعان. اكەسى قىزىن تانىمايتىن جىگىتكە ەركىنەن تىس تۇرمىسقا بەرگەنىن ايتادى.
پىكىر قالدىرۋ