بۇگىن سوتتا پروكۋراتۋرا وپپوزيسيالىق بەلسەندى جانبولات مامايعا جاڭا ايىپتاۋ اكتىسىن وقىپ، وعان قاڭتاردا «جاپپاي تارتىپسىزدىك ۇيىمداستىردى» دەگەن اۋىر باپتى ءىلدى. بۇل تۋرالى قۇقىققورعاۋشى، بەلسەندىنىڭ كەلىنشەگى ينگا يمانباي حابارلادى.
سوت شەشىمى بويىنشا كىنالى دەپ تانىلعان ادامدى 10 جىلعا دەيىن باس بوستاندىعىنان ايىرۋدى كوزدەيتىن ايىپ تىركەلمەگەن دەموكراتيالىق پارتيا جەتەكشىسىنە بۇعان دەيىن دە تاعىلىپ، كەيىن الىنىپ تاستالعان.
ينگا يمانباي ايىپتىڭ الىنۋىن حالىقارالىق ۇيىمداردىڭ قازاقستان بيلىگىنە قىسىم كورسەتۋىمەن جانە ەل ىشىندەگى جۇرتشىلىق نارازىلىعىمەن بايلانىستىرادى. الايدا پروكۋراتۋرا اۋىر ايىپتى قايتا تاعىپ وتىر.
"بۇل جانبولات مامايعا قارسى جاسالىپ وتىرعان ساياسي استارى بار قۋدالاۋ دەپ سانايمىز. مىنە، ون ءبىر ايدان استى، وعان قىلمىستىق كودەكستىڭ ءتۇرلى باپتارىن ءىلدى، ءبىرىن الىپ تاستادى، ەندى ءبىرىن قايتارىپ وتىر. جانبولاتتىڭ جاپپاي تارتىپسىزدىك ۇيىمداستىرۋعا ەش قاتىسى جوق. ونىڭ بارلىق سوزدەرى، قيمىل ارەكەتى تىكەلەي ەفيردە كورسەتىلدى، ەلدىڭ الدىندا ءجۇردى ءوزى دە" دەيدى ينگا يمانباي.
جانبولات ماماي 2022 جىلعى اقپان ايىندا قاڭتار وقيعاسىنىڭ 40 كۇندىگىنە وراي وتكەن قارالى ميتينگتەن كەيىن ۇزاماي ۇستالىپ، قاراشاعا دەيىن تەرگەۋ يزولياتورىندا قاماۋدا وتىرعان. وعان و باستا جاپپاي تارتىپسىزدىك ۇيىمداستىردى، پوليسياعا ءتىل تيگىزدى، جالعان اقپارات تاراتتى دەگەن ايىپتار تاعىلعان. بىلتىر قازان ايىنىڭ سوڭىندا جاپپاي تارتىپسىزدىك ۇيىمداستىردى دەگەن ايىپ بەيبىت جيىن وتكىزۋ ءتارتىبىن بۇزدى دەگەن جەڭىلىرەك ايىپقا اۋىستىرىلعانى بەلگىلى بولدى. ال 2 قاراشا كۇنى سوت وعان قاتىستى بۇلتارتپاۋ شاراسىن وزگەرتىپ، تەرگەۋ يزولياتورىنان ءۇيقاماققا جىبەرگەن. سودان بەرگى سوت وتىرىستارى جالعاسىپ كەلەدى.
