الماتىدا قازاق ءتىلىن وقىتاتىن ورتالىقتىڭ سانى 100-دەن استى، دەپ حابارلايدى Almaty.tv.
ارنايى اۆتورلىق باعدارلاما ارقىلى ءبىلىم بەرۋ ورتالىعى بۇگىنگە دەيىن 2 مىڭنان اسا ادامدى وقىتىپتى. بۇل قاتاردا كۇندەلىكتى قولدانىس ءۇشىن ءتىل ۇيرەنەمىن دەگەندەردەن بولەك، اكادەميالىق سويلەۋدى مەڭگەرۋ ءۇشىن كەلەتىن جان كوبەيگەن.
ورتالىقتا قازاق تىلىمەن بىرگە قازاق مادەنيەتىن ءداستۇرلى تۇردە تەرەڭدەتىپ وقىتادى.
«باسىندا قازاق ءتىلىن جاقسى بىلمەيتىنمىن. ەكى ايدىڭ ىشىندە وزگەرىس بار. دوستارىممەن قازاق تىلىندە سويلەسە باستادىق. ولار دا ۇيرەنىپ قالدى»، – دەدى ءبىلىم الۋشى ساكەن قۇرعانبايەۆ.
ورتالىق قازاق ءتىلىن ۇيرەتۋگە نەگىزدەلگەن. دەگەنمەن، ورىس جانە اعىلشىن ءتىلى كۋرسى دا بار. ءبىلىم الۋشىلار جەكە وقيدى. ال، توپتىق قۇرام كوبىنە پراكتيكالىق تاپسىرمالاردى ورىندايدى. ايتا كەتۋ كەرەك، مەملەكەتتىك ءتىلدى ۇيرەنۋگە قىزىعۋشىلىق تانىتاتىنداردىڭ ىشىندە شەتەل ازاماتى كوپ.
«قازاق ءتىلىن ۇيرەنۋگە نيەت تانىتقانداردىڭ باسىم بولىگى – ورىس ۇلتى. باسقا ۇلت وكىلدەرى دە بار. كارىستەر وقيدى، بەرليننەن كەلگەن ستۋدەنت قىزىمىز، امەريكادان ۇلىمىز بار. سوندىقتان ءارتۇرلى ۇلت وكىلى وقيدى دەپ ايتساق بولادى»، – دەدى ءبىلىم بەرۋ ورتالىعىنىڭ وقىتۋشىسى ايشا ءابدىراحمان قىزى.
«ءبىلىم بەرۋ ورتالىعىنىڭ نەگىزىگى ماقساتى – قازاق ءتىلىن دامىتۋ. مەملەكەتتىڭ ساياساتىنا، پرەزيدەنتتىڭ حالىققا جولداۋىنا ساي قازاق ءتىلىن دامىتۋ ءۇشىن اشتىق. سونداي-اق ورىس ءتىلى، اعىلشىن ءتىلى قوسىمشا وقىتىلادى»، – دەدى ءبىلىم بەرۋ ورتالىعىنىڭ ديرەكتورى مۇقيات قاعبات.
پىكىر قالدىرۋ