بولات نازاربايەۆتىڭ ەنشىلەس كومپانيالارىنا تيەسىلى جەرلەر مەملەكەتكە قايتارىلدى. بۇل تۋرالى "Amanat" پارتياسى جانىنداعى مەملەكەتتىك باسقارۋدى دامىتۋ جانە سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ ءتوراعاسى ەرلان سايىروۆ حابارلادى.

رەسمي مالىمەت بويىنشا، بولات نازاربايەۆتىڭ ەنشىلەس كومپانيالارىنا تيەسىلى ماڭعىستاۋ وبلىسىندا 239 مىڭ گەكتار، جامبىل وبلىسىندا 60 مىڭ گەكتار جەر مەملەكەت مەنشىگىنە قايتارىلعان. 

ونىڭ ايتۋىنشا، باس پروكۋراتۋرا بولات نازارباەاۆقا تيەسىلى استانا، الماتى، تالعار قالالارى، قاسكەلەڭ ەلدى مەكەنى، تۇركىستان وبلىسىنىڭ ەڭ ءتيىمدى جەرلەرىندە ورنالاسقان 244 گەكتار بولاتىن 59 جەر تەلىمىن انىقتاعان. بۇل جەرلەر بيزنەس-ورتالىقتارى، كوتتەدج قالاشىقتارىن سالۋعا ارنالعان.

"باس پروكۋراتۋرا، جەر رەسۋرستارى كوميتەتى انىقتاعانداي، جەر تەلىمدەرىنىڭ باسىم كوپشىلىگى زاڭسىز راسىمدەلگەن. ءقازىر باس پروكۋراتۋرا وسى جەر تەلىمدەرىن مەملەكەت مەنشىگىنە قايتارۋ جۇمىستارىن جۇرگىزىپ جاتىر. ءبىز بۇل ماسەلەنى قوعامدىق باقىلاۋدا ۇستايمىز"،  دەدى ەرلان سايىروۆ. 

بۇدان بولەك، ەرلان سايىروۆ قوعامدىق كەڭەسكە ازاماتتاردان قۇلىبايەۆ، كلەبانوۆ، ارسەلورميتتال، حالىق بانكى، جۋسان بانكىنە بايلانىستى ماتەريالدار ءتۇسىپ جاتقانىن ايتتى. اتالعان فاكتىلەر ءتيىستى ورگاندارعا تەكسەرۋ ءۇشىن جىبەرىلمەك.