2022 جىلدىڭ ءۇشىنشى توقسانىنىڭ قورىتىندىسى بويىنشا، تابىسى ەڭ تومەنگى كۇنكورىس دەڭگەيىنەن تومەن ءۇي شارۋاشىلىقتارىنىڭ سانى ءبىر جىل بۇرىنعىمەن سالىستىرعاندا 4،5% ءوسىپ، 180،9 مىڭعا جەتتى. بۇل ءۇي شارۋاشىلىقتارىندا 1 ملن ادام تۇرادى، كورسەتكىش ءبىر جىل بۇرىنعىدان 2،9% كوپ. بۇل تۋرالى Finprom.kz پورتالى حابارلادى.

سالىستىرۋ ءۇشىن: ءبىر جىل بۇرىن وسى كەزەڭدە ەلدە وسىنداي تومەن تابىسى بار 173،2 مىڭ ءۇي شارۋاشىلىعى (ءبىر جىلدا 7،5% ازايعان) بولعان. بيىلعى كورسەتكىش بىلتىرعى كورسەتكىشتەن جوعارى، ءبىراق 2020 جىلعى «كوروناداعدارىس» كەزىندە ەڭ جوعارى كورسەتكىشكە جەتكەن كەزدەگىدەن تومەن (187،2 مىڭ ءۇي شارۋاشىلىعى).

2022 جىلدىڭ ءۇشىنشى توقسانىنىڭ قورىتىندىسى بويىنشا، ەلىمىزدەگى 3،6 مىڭ ءۇي شارۋاشىلىعىنىڭ (ءبىر جىلدا 62،7% ازايعان) تابىسى ازىق-تۇلىك سەبەتى قۇنىنان تومەن بولدى. بۇل ءۇي شارۋاشىلىقتارىندا 24،8 مىڭ ادام تۇرادى، بۇل ءبىر جىل بۇرىنعىدان 2،2 ەسە از.

وڭىرلەر بويىنشا تابىسى ەڭ تومەنگى كۇنكورىس دەڭگەيىنەن تومەن ءۇي شارۋاشىلىقتارى تۇركىستان وبلىسىندا ەڭ كوپ: 25،4 مىڭ، ءبىر جىلدا 1% ازايعان. سونداي-اق كەدەيلىك شەگىنەن تومەن تۇراتىن حالىق سانى دا وسى وڭىردە: 191،1 مىڭ ادام.

تۇركىستان وبلىسىنان كەيىن ەڭ ناشار كورسەتكىشتەر الماتى قالاسى (15،9 مىڭ ءۇي شارۋاشىلىعى، ءبىر جىلدا 3،1% ازايعان)، شىمكەنت قالاسى (14،6 مىڭ ءۇي شارۋاشىلىعى، 26% كوبەيگەن)، ماڭعىستاۋ (12،9 مىڭ ءۇي شارۋاشىلىعى، 21،3% كوبەيگەن) جانە اقمولا (12،6 مىڭ ءۇي شارۋاشىلىعى، 28،7% كوبەيگەن) وبلىستارىندا.

تابىسى از ءۇي شارۋاشىلىقتارى ەڭ از وڭىرلەر ۇلىتاۋ، اتىراۋ جانە باتىس قازاقستان وبلىستارىندا.

2022 جىلدىڭ ءۇشىنشى توقسانىندا جان باسىنا شاققانداعى ورتاشا كۇنكورىستىڭ ەڭ تومەنگى دەڭگەيى 46،7 مىڭ تەڭگەنى قۇرادى، بۇل – ءبىر جىل بۇرىنعى كورسەتكىشتەن 26،9% ارتىق. بۇل رەتتە تۇتىنۋعا جۇمسالعان تابىس 80،2 مىڭ تەڭگەنى قۇراپ، ءبىر جىل ىشىندە 14،3% ءوستى. تۇتىنۋعا پايدالانىلعان تابىستىڭ ەڭ تومەنگى كۇنكورىس دەڭگەيىمەن قاتىناسى قر-دا ورتا ەسەپپەن 171،8%-دى قۇرادى.

تۇتىنۋعا پايدالانىلعان تابىس پەن ەڭ تومەنگى كۇنكورىس دەڭگەيىنىڭ قاتىناسى ەڭ جوعارى وڭىرلەر قاراعاندى وبلىسى: 233،6%. ەكىنشى جانە ءۇشىنشى ورىنداردا سولتۇستىك قازاقستان وبلىسى (208،5%) جانە الماتى قالاسى (206،7%).