2 اقپاندا قار ەرىپ، جاۋىن-شاشىن مول تۇسۋىنە بايلانىستى تۇركىستان وبلىسىنىڭ بەس اۋدانىندا 20 ەلدىمەكەندى سۋ باسىپ، 234 ءۇيدىڭ اۋلاسىنا سۋ كىردى. جاعداي تۇراقتالعانىمەن، كوپشىلىكتى وبلىس اۋماعىنداعى شاردارا سۋ قويماسىنىڭ تولۋى الاڭداتتى. الايدا بۇگىندە سۋ قويماداعى سۋ دەڭگەيى سەكۋندىنا 1500-1600 كۋب مەتردەن 1066 كۋب مەترگە تومەندەگەن. بۇل تۋرالى قامشى پورتالىنا تۇركىستان وبلىسى اكىمىنىڭ ءبىرىنشى ورىنباسارى ارمان جەتپىسباي ءمالىم ەتتى.

"تۇركىستان وبلىسىندا شاردارا سۋ قويماسىنىڭ تولۋى ۇلكەن ماسەلە بولدى. وسىعان وراي، 2023 جىلعى 9 قاڭتاردا وبلىس اكىمىمەن شاردارا سۋ قويماسىنداعى كورشى مەملەكەتتەن كەلەتىن سۋ كولەمىن ازايتۋعا ىقپال ەتۋ تۋرالى قازاقستان رەسپۋبليكاسى پرەمەر-مينيسترىنىڭ اتىنا حات جولدانعان. سونىمەن قاتار، شاردارا سۋ قويماسى مەن سىرداريا وزەنىندەگى سۋ تاسقىنىنىڭ الدىن الۋ ماسەلەلەرى ق ر پرەمەر-مينيسترىنىڭ ورىنباسارى ر.ۆ.سكلياردىڭ توراعالىعىمەن 2023 جىلعى 31 قاڭتاردا وتكەن ماجىلىستە قارالىپ، ءتيىستى تاپسىرمالار بەرىلدى. بۇگىنگى تاڭعا شاردارا سۋ قويماسىنا كەلەتىن سۋ مولشەرى سەكۋندىنا 1500-1600 كۋب مەتردەن 1066 كۋب مەترگە تومەندەدى" دەدى ارمان جەتپىسباي قامشى پورتالىنا بەرگەن رەسمي جاۋاپتا.

وبلىس اكىمى ءبىرىنشى ورىنباسارىنىڭ سوزىنشە، ەلدىمەكەندەردى سۋ تاسقىنىنان ساقتاۋ ءۇشىن ايماقتا 2022-2023 جىلعى كۇز-كوكتەمگى سۋ تاسقىنى كەزەڭىندە تاسقىن سۋلاردى ءقاۋىپسىز وتكىزۋدى قامتاماسىز ەتۋ ءىس-شارالار جوسپارى بەكىتىلىپ، اۋدان قالا اكىمدەرىنە، ءتيىستى دەپارتامەنت، باسقارما جانە مەكەمە باسشىلارىنا ورىنداۋ ءۇشىن جولدانعان.

"وسى جوسپاردى ورىنداۋ بارىسىندا سۋ تاسقىنىنىڭ الدىن الۋعا جالپى 462 ملن.تەڭگە ءبولىنىپ تاسقىنعا قارسى ينجەنەرلىك جۇمىستار اتقارىلدى. اتاپ ايتقاندا: 1218 شاقىرىمدى قۇرايتىن 680 ارىقتار مەن كانالدار قوقىستان تازارتىلىپ، 952 شاقىرىم قاشىرتقى ارنالار مەحانيكالىق تازارتۋدان وتكىزىلدى، تاسقىنعا قارسى 34 مىڭ 900 دانا قاپ، 1000 تونناعا جۋىق ينەرتتى ماتەريالدار ازىرلەندى. سونداي-اق، توتەنشە جاعدايعا دەن قويۋعا جەرگىلىكتى اتقارۋشى ورگاندار مەن توتەنشە جاعدايلار دەپارتامەنتى تاراپىنان جالپى 2065 جەكە قۇرام، 424 بىرلىك تەحنيكا، 5 قايىق، 116 موتوپومپا دايىندىققا كەلتىرىلدى" دەلىنگەن رەسمي جاۋاپتا.

ارمان جەتپىسبايدىڭ ايتۋىنشا، وبلىس سۋ باسۋ زارداپتارىن جويۋ، سۋ باسقان ەلدىمەكەندەردىڭ حالقىن ەۆوكۋاسيالاۋ سىندى شارۋالارعا ءازىر، ازاماتتىق قورعاۋ كۇشتەرى مەن قۇرالىمدارى، ءتيىستى تەحنيكالار دايىن..