قورعانىس مينيسترلىگى ۆەدومستۆونىڭ وقۋ ورىندارىنا ءتۇسۋ ەرەجەلەرى تۋرالى حابارلادى.
وتاندىق اسكەري ءبىلىم بەرۋ جۇيەسىنە ماگيستراتۋرا جانە دوكتورانتۋرا باعدارلامالارى بويىنشا جوعارى وقۋ ورنىنان كەيىنگى دايارلاۋ جۇزەگە اسىرىلاتىن ۇلتتىق قورعانىس ۋنيۆەرسيتەتى، ءۇش اسكەري جوعارى وقۋ ورنى، ەكى كوللەدج جانە الماتى، شىمكەنت جانە قاراعاندىداعى "جاس ۇلان" رەسپۋبليكالىق ءۇش مەكتەبى كىرەدى.
الماتى قالاسىنداعى قۇرلىق اسكەرلەرىنىڭ اسكەري ينستيتۋتى باسشىلىق ماماندىقتارى بويىنشا كادرلار دايارلاسا، ۇشۋ جانە ينجەنەرلىك-تەحنيكالىق قۇرامنىڭ ماماندارىن اقتوبە قالاسىنداعى اۋە قورعانىسى كۇشتەرىنىڭ اسكەري ينستيتۋتى دايىندايدى. الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك ينستيتۋتىندا راديوتەحنيكالىق ماماندىقتاردىڭ وفيسەر-ينجەنەرلەرى وقىتىلادى.
مينيسترلىككە قاراستى اسكەري ءبىلىم جانە عىلىم دەپارتامەنتىنىڭ باستىعى گەنەرال-مايور جۇمابەك احمەتوۆ اسكەري ينستيتۋتتارعا ءتۇسۋ ءۇشىن 30 ساۋىرگە دەيىنگى مەرزىمدە جەرگىلىكتى اسكەري باسقارۋ ورگانى باسشىسىنىڭ اتىنا ءوتىنىش وتكىزۋ كەرەكتىگىن ايتتى. ال قۇجاتتار 15-20 شىلدە ارالىعىندا قابىلدانادى.
بيىلدان باستاپ مەرزىمدى اسكەري قىزمەت اتقارعان جانە قولباسشىلىقتىڭ ۇسىنىسىن العان ازاماتتارعا جەڭىلدىكتەر قاراستىرىلماق.
بارلىق وقۋ كەزەڭىندە كۋرسانتتار تولىق مەملەكەت تاراپىنان قامتىلاتىن بولادى. الەۋمەتتىك پاكەتكە اقشالاي قاراجات، كيىم-كەشەك، كۇنىنە ءۇش رەت تاماقتانۋ، تەگىن مەديسينالىق كومەك جانە جاتاقحانادا تۇرۋ كىرەدى.
پىكىر قالدىرۋ