جۋىردا قامشى پورتالى رەسپۋبليكالىق ماڭىزى بار قالالار مەن وبلىس اكىمدەرىنىڭ اراسىندا «قاي اكىم حالىققا جاقىن؟» دەگەن اتاۋمەن ساۋالناما جۇرگىزگەن. ەندى ءار ايماق اكىمدەرىنىڭ تۇرعىندارمەن جۇمىسىن باعالاۋ، باعامداۋ ماقساتىندا ولاردى "ەسكى قازاقستان" شەندىلەرىمەن سالىستىرىپ كورمەكپىز.
وبلىس اكىمدەرى اراسىنداعى ساۋالناما ەل ەكونوميكاسى ءۇشىن باستى دونور ايماقتاردىڭ ءبىرى – اتىراۋ وبلىسىنان باستالادى. مۇنايلى ءوڭىردى تاۋەلسىزدىكتەن بەرى ونعا تارتا ادام باسقارعان. ولاردىڭ ىشىندە جۇمىس ىستەۋ تاسىلىمەن، ىسكەرلىگىمەن كوپتىڭ ىقىلاسىنا بولەنگەن اكىمدەر دە، بۇقارامەن ءىسى جوق، كابينەتىنەن شىقپايتىن شەنەۋنىكتەر دە بولدى. ايماققا كەيىن ەسىمى رەسپۋبليكاعا تانىمال بولعان تۇلعالار دا، جەرگىلىكتى دەڭگەيدە قالىپ قويعان ازاماتتار دا جەتەكشىلىك ەتتى. سول ونعا جۋىق باسشىنىڭ اراسىندا اسىرەسە يمانعالي تاسماعامبەتوۆ، اسلان مۋسين، بەرگەي رىسقالييەۆتىڭ اتى ءالى كۇنگە جۇرت جادىندا.
ال بۇگىندە اتىراۋ وبلىسىنا سەرىك شاپكەنوۆ اكىم بولىپ وتىر. قالا اكىمى، ۆيسە-مينيستر، وبلىس اكىمىنىڭ ورىنباسارى لاۋازىمدارىن اتقارىپ، ءبىرشاما تاجىريبە جيناعان. قازىرگى قىزمەتىنە كىرىسكەنىنە دە كوپ بولمادى. دەسە دە جىلعا جۋىق ۋاقىتتا ەلدى ەلەڭ ەتكىزەرلىكتەي ىسىمەن، باستاماسىمەن كوزگە تۇسە قويمادى. سەرىك شاپكەنوۆ قاتارداعى كوپ اكىمنىڭ ءبىرى بولىپ قالا ما، الدە ايماقتى العا سۇيرەگەن مەنەدجەر، مەملەكەت دەڭگەيىندەگى ءىرى ساياساتكەرگە اينالا ما، ول جاعىن ۋاقىت كورسەتە جاتىر. دەيتۇرعىنمەن العاشقى ىستەرى مەن شەشىمدەرىنەن-اق اكىمنىڭ قانداي بولارىن اڭعارۋعا بولادى. وعان باعا بەرۋدى وقىرمان ەنشىسىنە قالدىردىق.
پىكىر قالدىرۋ