مەملەكەت باسشىسى قاسىم-جومارت توقايەۆ ەلباسى تۋرالى زاڭنىڭ كۇشىن جوياتىن كونستيتۋسيالىق زاڭعا قول قويدى، دەپ حابارلادى اقوردانىڭ باسپا ءسوز قىزمەتى.
"مەملەكەت باسشىسى «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» قازاقستان رەسپۋبليكاسى كونستيتۋسيالىق زاڭىنىڭ كۇشi جويىلدى دەپ تانۋ تۋرالى» قازاقستان رەسپۋبليكاسىنىڭ كونستيتۋسيالىق زاڭىنا قول قويدى"، دەلىنگەن حابارلامادا.
11 قاڭتاردا كونستيتۋسيالىق سوت ەلباسى تۋرالى زاڭنىڭ كۇشى جويىلدى دەپ تانۋ تۋرالى قاۋلى شىعارعان. 13 قاڭتاردا پارلامەنت پالاتالاردىڭ بىرلەسكەن وتىرىسىندا زاڭ ءبىراۋىزدان قابىلداندى.
جاڭا زاڭعا سايكەس، نۇرسۇلتان نازاربايەۆ "ەلباسى" مارتەبەسىنەن جانە وسىعان بايلانىستى ارتىقشىلىقتاردان ايىرىلادى.
دەسە دە نازاربايەۆ پرەزيدەنتتەر تۋرالى زاڭعا ساي، پرەزيدەنت لاۋازىمى كەزىندەگى ىس-ارەكەتتەرى ءۇشىن جاۋاركەرشىلىككە تارتىلمايدى جانە ونىڭ ار-نامىسى مەن قادىر-قاسيەتىنە قول سۇعۋعا بولمايدى. بۇدان بولەك وعان پرەزيدەنت جالاقىسىنىڭ 80%-ى مولشەرىندە زەينەتاقى تولەنەدى. سونداي-اق مەملەكەت ەسەبىنەن پاتەر، كۇزەت، كولىكپەن، قامتاماسىز ەتىلەدى. ەل بويىنشا تەگىن ءجۇرىپ-تۇرىپ، مەديسينالىق قىزمەت پەن ساناتوريي-كۋرورتتىق ورىندار قىزمەتىن تەگىن پايدالانادى.
پىكىر قالدىرۋ