الماتى قالاسىنىڭ بوستاندىق اۋداندىق سوتى "Pioneer Capital Invest" ج ش س مەن Jusan Technologies Ltd اراسىنداعى "First Heartland Jusan Bank" اق-نىڭ، سونداي-اق ونىمەن بايلانىستى ۇيىمداردىڭ ("Jusan" توبى) اكتيۆتەرىن شەتەلدىك يۋريسديكسياعا بەرۋ تۋرالى مامىلەنى جارامسىز دەپ تانۋ تۋرالى الماتى قالاسى پروكۋرورىنىڭ تالاپ-ارىزى بويىنشا ازاماتتىق ءىس قوزعادى، دەپ حابارلايدى باس پروكۋراتۋرانىڭ باسپا ءسوز قىزمەتى.
بىلتىر ماۋسىمدا پرەزيدەنت قاسىم-جومارت توقايەۆتىڭ تاپسىرماسىمەن ەلدەن زاڭسىز شىعارىلعان قاراجاتتى قازاقستانعا قايتارۋ جونىندەگى ۆەدومستۆوارالىق كوميسسيا قۇرىلعان ساتتەن باستاپ باس پروكۋراتۋرا كاپيتالدى جىمقىرۋ جانە شەت ەلگە شىعارۋ فاكتىلەرىن انىقتاۋ ءۇشىن بانك سەكتورىندا تالداۋ جۇرگىزدى.
تالداۋ بارىسىندا "Jusan" توبىنىڭ اكتيۆتەرىن باسقارۋ قۇرىلىمىن وزگەرتۋدىڭ كولەڭكەلى سحەماسى انىقتالعان. بۇل سحەمانى جۇزەگە اسىرۋ ناتيجەسىندە توپتىڭ قىزمەتىن باقىلاۋ قۇزىرەتى شەتەلدە تىركەلگەن ۇيىمدارعا وتەۋسىز بەرىلگەن.
اتاپ ايتقاندا، 2020 جىلعى 27 ساۋىردە Jusan توبىنىڭ يەسى "Pioneer Capital Invest" ج ش س قاتىسۋشىلارىنىڭ جالپى جينالىسىندا Pioneer مۇلكىن شەتەلدە تىركەلگەن Jusan Technologies Ltd كومپانياسىنىڭ جارعىلىق كاپيتالىنا بەرۋدى ماقۇلداۋ تۋرالى شەشىم قابىلدانعان.
"بۇل ارەكەتتەر قوعامدىق مۇددەگە، ونىڭ ىشىندە "نازاربايەۆ ۋنيۆەرسيتەتى" مەن "نازاربايەۆ زياتكەرلىك مەكتەپتەرىنىڭ" ونداعان مىڭ قازاقستاندىق ستۋدەنتى مەن وقۋشىلارىنىڭ مۇددەسىنە ءقاۋىپ ءتوندىردى. سەبەبى "Jusan" توبىنىڭ اكسيالارى، وبليگاسيالارى مەن دەپوزيتتەرى بويىنشا ديۆيدەندتەرى – اتالمىش وقۋ ورىندارىن قارجىلاندىرۋ كوزدەرىنىڭ ءبىرى"، - دەيدى باس پروكۋراتۋرا.
بۇدان بولەك، 2023 جىلعى 3 اقپاندا باس پروكۋراتۋراعا "نازاربايەۆ قورىنان" ارىز ءتۇستى. قور ءبىرقاتار سۋبەكتىنىڭ قۇقىققا قارسى ارەكەتتەرىنىڭ سالدارىنان "Jusan" توبى شەتەلدىك ازاماتتاردىڭ باقىلاۋىنا ءوتىپ كەتكەنىنە شاعىمدانىپ، پروكۋرورلىق قاداعالاۋ شارالارىن قابىلداۋدى سۇراعان.
"وسىلايشا پروكۋراتۋرا ورگاندارىنىڭ ماقساتى – تەك ادىلەتتىلىكتى قالپىنا كەلتىرىپ، "Jusan" توبىنىڭ اكتيۆتەرىن باسقارۋدى قازاقستاننىڭ قۇزىرىنا قايتارۋ"، - دەپ ناقتىلادى باس پروكۋراتۋرانىڭ باسپا ءسوز قىزمەتى.
اتالعان تالاپ-ارىز Jusan Bankءتىڭ جۇمىسىنا قاتىستى ەمەس، ياعني ونىڭ اعىمداعى قىزمەتىنە، سونداي-اق بانك كليەنتتەرى مەن ىسكەرلىك سەرىكتەستىكتەرىمەن ءوزارا ءىس-قيمىلىنا شەكتەۋ قويمايدى.
ءىستىڭ سوتتا قارالۋى Jusan Bankءتىڭ جۇمىسىنا اسەر ەتپەيدى، ول قالىپتى جاعدايدا جۇمىسىن جالعاستىرادى، دەپ سەندىردى باس پروكۋراتۋرا.
