الماتىدا مەملەكەتتىك باعدارلاما بويىنشا پاتەر الىپ بەرۋگە ۋادە بەرىپ، تۇرعىنداردى الداپ كەلگەن ادام ۇستالدى. قازىرگى ۋاقىتتا كۇدىكتىنىڭ 10 ەپيزودقا قاتىسى بارى انىقتالعان. پوليسيا الداۋ ارەكەتىنىڭ قۇرباندارى بۇدان دا كوپ بولۋى مۇمكىن ەكەنىن ايتادى.
Polisia.kz پورتالىنىڭ حابارلاۋىنشا، كۇدىكتى 31 جاستاعى كۇدىكتىنى ناۋرىزباي اۋدانىنىڭ پوليسيا قىزمەتكەرلەرى ۇستاعان.
ب. ەسىمدى ازامات مەملەكەتتىك باعدارلاما بويىنشا پاتەر ساتۋ تۋرالى اقپارات تاراتىپ، تۇرعىنداردان الدىن الا تولەم سوماسى رەتىندە 50 مىڭ تەڭگەدەن 300 مىڭ تەڭگەگە دەيىن اقشا الىپ وتىرعان. اقشانى قولىنا تۇسىرگەن سوڭ، باييلانىسسىز كەتىپ وتىرعان.
"ءبىزدىڭ بولىمشەنىڭ كريمينالدىق پوليسيا ءبولىمىنىڭ قىزمەتكەرلەرى كۇدىكتىنى ۇستادى. ق ر قك-نىڭ 190-بابى 3-بولىگىنە (الاياقتىق) سايكەس قىلمىستىق ءىس قوزعالدى. تەرگەۋ بارىسىندا ۇستالعان ازاماتتىڭ وسىعان ۇقساس 10 ەپيزودقا قاتىستىلىعى انىقتالدى. كۇدىكتى ۋاقىتشا ۇستاۋ يزولياتورىنا قامالدى. الدانعان ادامدار ودان دا كوپ بولۋى مۇمكىن. وسى ورايدا ازاماتتاردى وسى ادامنىڭ سۋرەتىنە مۇقيات قاراپ، ونى تانىعان جاعدايدا مىنا تەلەفوندار ارقىلى حابارلاسۋعا شاقىرامىز: 8-707-447-07-50؛ 8-701-707-77-10؛ 8-747-699-70-02" دەيدى ناۋرىزباي اۋداندىق پوليسيا باسقارماسىنىڭ باستىعى مۇحامەدالى سەيسەن ۇلى.
پىكىر قالدىرۋ