سىبايلاس جەمقورلىققا قارسى قىزمەت اگەنتتىگىنىڭ وكىلدەرى تۇركىستان وبلىسى جەتىساي اۋدانىنىڭ اكىمشىلىگىن تەكسەرىپ، اۋىلدىق وكرۋگتەردىڭ اكىمدەرىن قىلمىستىق جاۋاپكەرشىلىككە تارتۋمەن قورقىتىپ، ولاردان اقشالاي قاراجات تالاپ ەتكەن.
باس پروكۋراتۋرا مالىمەتىنشە، انتيكور قىزمەتكەرلەرىنىڭ تۇراقتى تۇردەگى تالاپتارىنان كەيىن اكىمشىلىك جۇمىسكەرلەرى تەكسەرۋشىلەرگە تەكسەرىستىڭ وڭ شەشىلۋى ءۇشىن 400-مىڭنان 630-مىڭ تەڭگەگە دەيىنگى قاراجات بەرگەن.
ناتيجەسىندە 7 اۋىلدىق وكرۋگتىڭ اكىمى مەن اكىمشىلىكتىڭ 1 ەسەپشىسى سوتتارمەن ءارتۇرلى مەرزىمگە باس بوستاندىقتارىنان ايىرۋ جانە ايىپپۇل تۇرىندەگى جازالارعا تارتىلعان.
"باس پروكۋروردىڭ نارازىلىعىمەن جوعارعى سوت ولاردى تولىعىمەن اقتاپ، سىبايلاس جەمقورلىققا قارسى قىزمەت وكىلدەرىنىڭ ىس-ارەكەتتەرىندە تىكەلەي ارانداتۋشىلىق بار ەكەنىن انىقتاعان. ءوز كەزەگىندە، 2 جەدەل وكىلگە قاتىستى قىلمىستىق كودەكتىڭ 362-بابى 4-بولىگىمەن (بيلiكتi جانە لاۋازىمدىق وكiلەتتiكتەردى اسىرا پايدالانۋ) سوتقا دەيىنگى تەرگەپ-تەكسەرۋ باستالدى. تەرگەپ-تەكسەرۋدى باس پروكۋراتۋرانىڭ ارنايى پروكۋرورى جۇرگىزىپ، كىنالەرىن تولىعىمەن دالەلدەپ، قىلمىستىق ءىس سوتقا جولداندى”، – دەلىنگەن ۆەدومستۆو حابارلاماسىندا.
تۇركىستان وبلىسى جەتىساي اۋداندىق سوتىنىڭ 2023 جىلعى 26 قاڭتارىنداعى ۇكىمىمەن اۋىر ساناتتاعى لاۋازىمدىق قىلمىستى جاساعاندارى ءۇشىن سىبايلاس جەمقورلىققا قارسى قىزمەتىنىڭ بۇرىنعى 2 جەدەل وكىلى ارنايى شەندەرىنەن ايىرىلىپ، ءارقايسىسى 6 جىلعا باس بوستاندىقتارىنان ايىرۋ جازاسىنا تارتىلگەن. جابىرلەنۋشىلەردىڭ پايداسىنا مورالدىق زالال وندىرىلگەن.
پىكىر قالدىرۋ