تاۋەلسىزدىك جىلدارىنان بەرى بالالارعا ەڭ ءجيى قويىلعان ەسىمدەردىڭ يندەكسى تولىق جاڭارىپ، اتتاردىڭ ءمان-مازمۇنى ءدىني سيپاتقا ويىسقانى بايقالادى. بۇل تۋرالى استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ءمالىم ەتتى.
ساكەن ەسىركەپ بالاعا ات قويۋ حالىقتىڭ رۋحاني قۇندىلىعىن، نەگە ءجىتى كوڭىل بولەتىنىن ايقىندايتىن بارومەتر ەكەنىن، مۇنى انتروپونيميكا عىلىمى دا دالەلدەيتىنىن ايتادى.
"توقسانىنشى جىلدارى ۇل بالالاردىڭ توپ وندىعىندا ازامات، نۋرسۋلتان، باۋىرجان، دانيار، ەرلان، ولجاس، رۋسلان، ارمان، ەرجان، جاندوس اتتارى ورنالاسسا، سوڭعى 2022 جىلى اليحان، ومار، الديار، ايسۇلتان، امير، نۇريسلام، الان، الي، الينۇر، ارسەن دەگەن اتتار كوش باستاعان.
قىزداردا 1991 جىلى ايگەريم، ايدانا، دينارا، اينۋر، جانار، ايجان، اسەل، مادينا، سالتانات، ارايلىم ەسىمى ءجيى قويىلسا، بىلتىر مەدينا، ايلين، ايشا، اسىلىم، توميريس، ايالا، رايانا، سافيا، ايزەرە جانە ايىم اتتى بۇلدىرشىندەر دۇنيەگە كوپ كەلگەن ەكەن.
وتىز جىل ىشىندە بالالارعا ەڭ ءجيى قويىلعان ەسىمدەردىڭ يندەكسى تولىق جاڭارعانىن كوردىڭىزدەر. سونىمەن بىرگە اتتاردىڭ ءمان-مازمۇنى دا ءدىني سيپاتقا ويىسقانى بايقالىپ تۇر. بۇل ادامداردىڭ ءدىني كوزقاراسىنا بايلانىستى ما، الدە ەلىكتەۋشىلىكتەن بە؟ ول جاعى جەكە زەرتتەۋدى قاجەت ەتەدى.
قىزدارعا ەسىم قويۋدا ءا، ق، ءى، ءۇ، ۇ، ءو، ع سياقتى قازاقتىڭ ءتول دىبىسىنان قاشۋ ءۇردىسى بايقالادى. بۇل اينۋرا، نۋراي، اسەل، كاراگوز، گۋلسيم دەگەن سياقتى ءتول دىبىسىمىزدى بۇرمالايتىن اتتاردىڭ كوبەيگەنىنە قاراعاندا جاقسى دا شىعار.
زامان ءبىر ورنىندا تۇرمايدى. كوزقاراس، قۇندىلىقتىڭ ۋاقىت وتە وزگەرىپ وتىرعانى دا دۇرىس شىعار. دەسە دە بالاعا ات قويۋدا ۇتقانىمىزدان ۇتىلعانىمىز كوپ ەمەس پە دەگەن وي كەلەدى ەكەن" دەيدى ساكەن ەسىركەپ.
پىكىر قالدىرۋ