باس اسكەري پروكۋراتۋرا 2022 جىلدىڭ تامىزىندا "ءشولدالا" شەكارا زاستاۆاسىندا سۋيسيد جاساعان مەرزىمدى اسكەري قىزمەتشىسى بەكبول ميراشتىڭ ءولىمىن تەرگەۋ بارىسى تۋرالى مالىمەت بەردى.
ۆەدومستۆو دەرەگىنشە، بيلىكتى اسىرا پايدالانۋ ارقىلى ءوزىن-وزى ولتىرۋگە دەيىن جەتكىزۋ ايىبى بويىنشا كۇدىكتى رەتىندە سول زاستاۆانىڭ كەلىسىمشارت بويىنشا اسكەري قىزمەتشىسى تەرگەلىپ جاتىر. قىلمىستىق ءىس ماتەريالدارىنا سايكەس" ول ب.ميراشتى جانە ونىمەن بىرگە اسكەرگە شاقىرىلعان باسقا دا مەرزىمدى اسكەري قىزمەتكەرلەردى جۇيەلى تۇردە پسيحولوگيالىق تۇرعىدا قورلاپ، سوققىعا جىققان.
"كۇدىكتى قاماۋعا الىنىپ، تەرگەۋ جالعاسۋدا جانە ەرەكشە باقىلاۋعا الىنعان. تەرگەۋ بارىسىندا بولعان وقيعانىڭ بارلىق نۇسقالارى، سونىڭ ىشىندە جىنىستىق زورلىق-زومبىلىق مۇمكىندىگى تەكسەرىلدى. الايدا، بۇل دەرەك راستالماعان. ادۆوكاتتىڭ ءوتىنىشحاتتارى بەلگىلەنگەن مەرزىمدە قارالدى جانە قىلمىستىق ءىس جۇرگىزۋ زاڭناماسى تارتىبىمەن قاناعاتتاندىرىلدى" دەلىنگەن باس اسكەري پروكۋراتۋرا حابارلاماسىندا.
كۇدىكتى سەرجانت ايبەك نۇرتايەۆتىڭ ادۆوكاتى سەرجان پىرالييەۆ تاياۋدا جۋرناليستەرگە وسى ىسكە قاتىستى ادام سەنگىسىز فاكتىلەردى جاريا ەتكەن. ونىڭ سوزىنشە، ساربازدىڭ كيىمى مەن اۋزىنان بىرنەشە ادامنىڭ شاۋەتى انىقتالعان. وسى اقپاراتتى جاريالاعانى ءۇشىن ءىىم پىرالييەۆتى "ادۆوكاتتىق ەتيكانى بۇزدى" دەپ ايىپتاپ، ءىستى ادىلەت مينيسترلىگىنە جولداعان.
الايدا استانا قالاسىنىڭ ادۆوكاتتار القاسى سەرجان پىرالييەۆ ەشقانداي ەتيكالىق نورمالاردى بۇزباعانىن انىقتادى.
جۋىردا ق ر ۇقك ءتوراعاسىنىڭ ورىنباسارى – شەكارا قىزمەتىنىڭ ديرەكتورى، گەنەرال-مايور ەرلان الداجۇمانوۆ بەكبول ميراشتىڭ ولىمىنەن كەيىن قىزمەتتىك تەرگەۋ جۇرگىزىلىپ، دەپارتامەنت پەن زاستاۆا باستىعى قىزمەتىنەن شەتتەتىلگەنىن ايتتى.
دەرەككوز: ulysmedia.kz
پىكىر قالدىرۋ