قازاقستاندا اكىمشىلىك قۇقىق بۇزۋشىلىق تۋرالى كودەكستىڭ جول ءجۇرۋ ەرەجەسىنە قاتىستى ءۇش ءتۇرلى بابىنا وزگەرىستەر مەن تولىقتىرۋ ەنگىزىلمەك. 

ادىلەت مينيسترلىگى «اشىق نقا» پورتالىندا «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋ ەنگىزۋ تۋرالى» زاڭ جوباسىن جاريالادى. وزگەرىستەرگە سايكەس 592-باپ بويىنشا جىلدامدىقتى 80 كم/ساع جانە ودان اسىرعان جۇرگىزۋشىگە 40 اەك (138 000 تەڭگە) كولەمىندە ايىپپۇل سالىنادى. ءبىر جىل ىشىندە تاعى ءتارتىپ بۇزعان جاعدايدا ايىپپۇل 60 اەك-كە (207 000 تەڭگە) دەيىن وسەدى.

سونىمەن قاتار، 593-باپ بويىنشا كولىك جۇرگىزۋ كەزىندە ەسىكتەردى اشۋ جانە وسىعان ۇقساس ارەكەتتەردى جاساعان جاعدايدا 10 اەك (34 500 تەڭگە) مولشەرىندە ايىپپۇل سالىنباق.

«قازىرگى ۋاقىتتا مەكتەپ ءبىتىرۋ كەشى مەن ۇيلەنۋ تويلارى كەزىندە، كولىك ءجۇرىپ بارا جاتقان كەزدە جولاۋشىلار كولىك ليۋكتەرىنەن نەمەسە تەرەزەدەن شىعىپ، ومىرىنە ءقاۋىپ توندىرەتىن ارەكەت جاسايدى. سوندىقتان مۇنداي جايتتاردىڭ الدىن-الۋ ءۇشىن جۇرگىزۋشىمەن قاتار جولاۋشىلاردى دا جاۋاپكەرشىلىككە تارتۋ قاراستىرىلۋدا»، - دەلىنگەن حابارلامادا.

تەمىرجول وتكەلدەرىنەن ءوتۋ ەرەجەلەرىن بۇزعان جاعدايدا ايىپپۇلدى – 10 اەك-تەن (34 500 تەڭگە) 20 اەك-كە (69 000 تەڭگە) دەيىن كوتەرۋ ۇسىنىلۋدا، ەگەر زاڭ بۇزۋشىلىق ءبىر جىل ىشىندە قايتالانسا، جۇرگىزۋشىنى ءبىر جىلعا جۇرگىزۋشى كۋالىگىنەن ايىرادى. قۇجات جوباسى قوعامدىق تالقىلاۋدا 13 ناۋرىزعا دەيىن بولادى.