اقمولا وبلىسى پوليسيا دەپارتامەنتى قازاقستاندى رەسەيگە قوسۋ يدەياسىن قولدايتىنىن مالىمدەگەن اقمولا وبلىسى تۇرعىنىنىڭ مالىمدەمەسىندە قىلمىس قۇرامى جوق دەپ شەشكەن. بۇل تۋرالى كازتاگ سايتى حابارلادى.
پوليسيا دەپورتامەنتى ازاماتپەن پروفيلاكتيكالىق اڭگىمە جۇرگىزۋمەن شەكتەلگەن.
"ارتەم ابراموۆپەن پروفيلاكتيكالىق اڭگىمەلەر جۇرگىزىلدى، قىلمىستىق ارەكەت بەلگىلەرى بايقالعان جوق"، دەلىنگەن اقمولا وبلىستىق پوليسيا دەپارتامەنتى باسپا ءسوز قىزمەتىنىڭ حابارلاماسىندا.
اتباسار قالاسىنىڭ تۋماسى ارتەم ابراموۆ "Chatroulette" قوسىمشاسى ارقىلى ۋكراينالىق بلوگەردىڭ باعدارلاماسىنا بىلدىرگەن پىكىرىندە قازاقستاننىڭ رەسەيگە قوسىلۋىن قولدايتىنىن، پۋتين "ارنايى وپەراسيا" وتكىزۋگە شەشىم قابىلداسا، قولىنا قارۋ الىپ، قازاقستاندىقتارعا قارسى كۇرەسۋگە دايىن ەكەنىن ايتقان. كەيىن جەلىدە ابراموۆتىڭ ارانداتۋشىلىق قۇربانى رەتىندە كەشىرىم سۇراعان جازباسى پايدا بولدى.
بۇعان دەيىن اقمولا وبلىسى جارقايىڭ اۋدانى دەرجاۆينسك قالاسىنىڭ تۇرعىنى رۋسلان ەلفيموۆ تا وسى قوسىمشا ارقىلى رەسەي قازاقستاننان سولتۇستىك ايماقتاردى تارتىپ السا، قۋاناتىنىن ايتقان ەدى. ول رەسەي تاراپىندا قازاقستانعا قارسى سوعىسقىسى كەلەتىنىن اشىق مالىمدەگەن.
ال 2022-جىلدىڭ قازان ايىندا الەۋمەتتىك جەلىدە ەلفيموۆتىڭ كوللابورانت (رەسەي وككۋپاسياسىن جاقتاۋ - رەد.) ەكەنىن ايتقان ۆيدەوسى تاراعان. وسىعان بايلانىستى ۇلتتىق قاۋىپسىزدىك كوميتەتىنىڭ اقمولا وبلىستىق دەپارتامەنتى ق ر قىلمىستىق كودەكسىنىڭ 180-بابى (سەپاراتيستىك ارەكەت) بويىنشا قىلمىستىق ءىس قوزعادى.
پىكىر قالدىرۋ