جاپونيانىڭ حاماماسۋ قالاسى ەنسۋحاما جاعالاۋىنان تابىلعان مەتال شار سۋ بەتىندە قالقىپ تۇراتىن بۋي ەكەنى انىقتالدى. بۇل تۋرالى The Telegraph باسىلىمى جازدى.

شاردى رەنتگەن ساۋلەسى ارقىلى تەكسەرگەننەن كەيىن زات جارىلىس ءقاۋپىن تۋدىرمايدى دەگەن قورىتىندى جاسالىپ، پوليسيا جاعالاۋ اۋماعىنداعى قورشاۋدى الىپ تاستادى. وسىلايشا، بەلگىسىز زات جۇڭگو نەمەسە سولتۇستىك كورەيانىڭ بارلاۋعا ارنالعان اپپاراتى بولۋى مۇمكىن دەگەن كۇدىك راستالمادى.

حاماماسۋ قالاسى تەحنيكالىق دەپارتامەنتىنىڭ باسشىسى ناريۋكي تاكاحاشي شار تارىزدەس زات جاپون وندىرۋشىلەرىنە تيەسىلى ەمەستىگىن، ونى قالاداعى ءوندىرىس ورىندارىنىڭ بىرىنە جەتكىزگەنىن ايتتى. ەگەر زاتتىڭ يەسى تابىلماسا، ونى قايتا وڭدەۋگە جىبەرەدى. 

كەشە ەنسۋحاما جاعالاۋىنان ديامەترى 1،5 مەتر بولاتىن تەمىر شار تارىزدەس زات تابىلعان. بەلگىسىز زات جۋىردا اقش اۋماعىندا ۇشۋ اپپاراتى اتىپ تۇسىرىلگەننەن كەيىن كوپشىلىك نازارىن اۋدارتقان. اقش ۇشۋ اپپاراتى قىتايدىڭ بارلاۋ نىسانى بولۋى مۇمكىن دەسە، جۇڭگو ونى قاراپايىم مەتەوزوند ەكەنىن ايتادى. وسى وقيعادان كەيىن جاپونيا قورعانىس مينيسترلىگى جاپون اۋە كەڭىستىگىنە ەنگەن كۇدىكتى اۋە نىساندارعا قارسى قارۋ قولدانۋ ەرەجەلەرىن كەڭەيتەتىنىن ءمالىم ەتكەن.