2023 جىلدىڭ باسىنان بەرى 3 مىڭنان استام ەتنيكالىق قازاق قانداس مارتەبەسىن الدى. بۇل تۋرالى  ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز حاتشىسى ساكەن دىلداحمەت حابارلادى. 

ونىڭ حابارلاۋىنشا، جالپى 1991 جىلدان بەرى رەسپۋبليكاعا 1 ميلليون 110،1 مىڭ ەتنيكالىق قازاق ورالعان.

جىل باسىنان قازاقستانعا كەلگەن قانداستاردىڭ جارتىسى وزبەكستاننان - 50،0%)، 16،3% – قىتايدان، 15،9% – رەسەيدەن 8،4% – تۇرىكمەنستاننان، 4،5% – موڭعوليادان جانە 4،9% باسقا ەلدەردەن.

كەلگەن ەتنيكالىق قازاقتار نەگىزىنەن الماتى (27%)، ماڭعىستاۋ (16،6%)، تۇركىستان (7،1%) جانە جامبىل (3،6%) وبلىستارىنا، سونداي-اق استانا (10،5%)، الماتى (7،6%) جانە شىمكەنت (6،5%) قالالارىنا قونىستانعان. 2023 جىلدىڭ 1 اقپانداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 69،1%-دى، ەڭبەككە قابىلەتتى جاستان كىشى 22،7%-دى جانە زەينەتكەرلەر 8،2%-دى قۇرايدى.

ەڭبەككە قابىلەتتى جاستاعى كانديداتتاردىڭ ىشىنەن ءبىلىم دەڭەيى بويىنشا 20،1% جوعارى ءبىلىمدى، 40،9% ورتا كاسىبي ءبىلىمدى، 35،2% جالپى ورتا ءبىلىمدى جانە 3،8% ءبىلىمى جوق.