توتەنشە جاعدايلار مينيسترلىگى سەيسمولوگيا ينستيتۋتى ايماقتىق سەيسميكالىق زەرتتەۋلەر زەرتحاناسىنىڭ عىلىمي قىزمەتكەرى اقكەنجە سيىلقانوۆا ورتالىق ازيا ەلدەرىندەگى جەر سىلكىنىسىنىڭ قازاقستان ءۇشىن قانشالىقتى ءقاۋىپتى بولۋى مۇمكىن ەكەنىن ايتتى،  دەپ حابارلايدى Tengrinews.kz

سەيسمولوگ ورتالىق ازيا ايماعى الەمدەگى ەڭ سەيسميكالىق ايماقتاردىڭ ءبىرى ەكەنىن اتاپ ءوتتى. ونىڭ ىشىندە اۋعانستان مەن تاجىكستان اۋماعىنىڭ سەيسميكالىق ءقاۋپى جوعارى.  

"اۋعانستانداعى جەر سىلكىنىسىنىڭ تولقىندارى ءبىزدىڭ اۋماققا، اسىرەسە ەلىمىزدىڭ وڭتۇستىك بولىگىنە: شىمكەنت پەن تۇركىستان وبلىسىنا جەتۋى مۇمكىن. جەر سىلكىنىسى ەپيسەنترىندە 7–7،2 باللدى قۇراسا، ءبىز 2–3 بالل سەزىنەمىز"،  – دەدى سەيسمولوگ.

ونىڭ مالىمدەۋىنشە، ورتالىق ازيا مەن الماتى وبلىسى ءارقاشان سەيسميكالىق جاعىنان وتە ءقاۋىپتى ايماق بولىپ سانالادى. مۇنداي ايماقتاردا كۇشتى جەر سىلكىنىستەرى 80–200 جىلدا قايتالاناتىنىن ۇمىتپاۋ كەرەك.

سونداي–اق، اقكەنجە سيىلقانوۆا اۋعانستان مەن تاجىكستانداعى سوڭعى جەر سىلكىنىسىنىڭ تۇركياداعى وقيعاعا جانە الەمدەگى باسقا دا سەيسميكالىق وقيعالارعا ەش قاتىسى جوق ەكەنىن ايتتى. مامان جەر استى دۇمپۋلەرىنە اسەر ەتەتىن باسقا دا فاكتورلار بار ەكەنىن مالىمدەدى. تۇركياداعى جويقىن جەر سىلكىنىسى ورتالىق ازيا مەن الەمنىڭ باسقا ايماقتارىندا سەيسميكالىق بەلسەندىلىكتى تۋدىرادى دەۋگە بولمايدى.

ەسكە سالا كەتەيىك، 21 ناۋرىزدا اۋعانستاندا شامامەن 7 بالدىق جەر سىلكىنىسى بولىپ، ونى شىمكەنت پەن تاراز تۇرعىندارى دا سەزىنگەن بولاتىن.

ال 23 ناۋرىزدا تاجىكستاندا كۇشتى جەر سىلكىنىسى بولىپ، سالدارىنان التى اۋىل زارداپ شەكتى.