وڭتۇستىك كورەيانىڭ كەدەندىك باقىلاۋ زاڭدارىن بۇزىپ، وزگە ەلدىڭ شەكاراسىن زاڭسىز كەسىپ وتكەن ەكىنشى قازاقستاندىق ۇستالدى. ول ينچحون قالاسىنىڭ سادانجي اۋدانىندا پوليسياعا ءوز ەركىمەن بەرىلگەن، دەپ حابارلادى سىرتقى ىستەر مينيسترلىگى.

"شەكارانى زاڭسىز كەسىپ وتكەنى ءۇشىن ىزدەۋدە بولعان ەكىنشى قازاقستان ازاماتى كورەي پوليسياسىنا ءوز ەركىمەن تاپسىرىلدى. قازاقستان رەسپۋبليكاسىنىڭ ەلشىلىگى بۇل ماسەلەنى ەرەكشە باقىلاۋدا ۇستاپ، وتانداستارىمىزعا زاڭگەرلىك كەڭەس بەرەدى" – دەپ حابارلادى سىرتقى ىستەر مينيسترلىگىنىڭ باسپا ءسوز حاتشىسى ايبەك سمادياروۆ.

ۇستالعان ازامات – تۇركىستان قالاسىنىڭ 2005 جىلعى تۋماسى نۇرسۇلتان يريسبايەۆ. كورەيا ۇكىمەتى ىزدەۋدە بولعان قازاقستاندىقتى تابۋعا كومەك بەرگەن ادامعا 30 ملن ۆون سىياقى، ەگەر كومەك بەرگەن ادام زاڭسىز ميگرانت بولسا، كورەيانىڭ وزىندە ۆيزا جاساپ بەرەتىنىن ايتقان بولاتىن.

سونىمەن قاتار، پوليسيا قاشقىن ءوز ەركىمەن بەرىلمەسە، باسقا قازاقستاندىق ازاماتتار مەن زاڭسىز ميگرانتتارعا قىسىم كورسەتىلەتىنىن ايتقان. ودان بولەك كورەياعا كەلەتىندەرگە ەلگە كىرۋ ءتارتىبى قاتاڭداتىلاتىنىن دا ەسكەرتتى.

ەسكە سالا كەتەيىك، 25 ناۋرىز كۇنى ەكى قازاقستان ازاماتى كورەياداعى ينچحون اۋەجايىنداعى بيىكتىگى 3،6 مەترلىك قورشاۋدان اسىپ قاشىپ كەتكەن بولاتىن. ولاردىڭ ءبىرى تەدجون قالاسىنان قاماۋ الىنعان ەدى.