جارتى عاسىردان استام ۋاقىت بۇرىن ءشامشى قالداياقوۆ پەن جۇمەكەن ناجىمەدەنوۆ جازعان "مەنىڭ قازاقستانىم" ءانى 2006 جىلى ەلىمىزدىڭ ءانۇرانى بولىپ بەكىتىلگەن بولاتىن. ءاننىڭ شىعۋ تاريحى دا، ودان كەيىنگى تاعدىرى دا قىزىق. بۇل ءان رەسمي تۇردە بەكىتىلمەي تۇرىپ تا، بارشا حالىقتىڭ ۇرانىنا اينالعان ەدى. رەسمي تۇردە ءانۇران بولىپ تانىلاردا نۇرسۇلتان نازاربايەۆتىڭ ەسىمى قوسىلىپ، ءاننىڭ سوزدەرىنە وزگەرىس ەنگىزىلدى. 

"ءستاليندى تابالاپ، سۇيەگىن ماۆزولەيدەن الىپ، قارا جەر قويناۋىنا كومگەن حرۋششيەۆ قازاق جەرىنە قىرعيداي ءتيدى. قازاقستاننىڭ سولتۇستىكتەگى 5 وبلىسىنان تىڭ ولكەسىن قۇردى. "تۇبىندە ول ولكەنى روسسياعا قوسادى" دەگەن ءسوز شىقتى. بۇل نە دەگەن سۇمدىق! قازاق جەرىن تالان-تاراجعا سالۋعا، بولشەكتەۋگە بولا ما؟ اتا-بابالارىمىزدىڭ اق نايزانىڭ ۇشىمەن ۇرپاقتارىنا قالدىرىپ كەتكەن ۇلان-بايتاق دالاسىن كىمدەر تاپتاماق؟ كوكىرەگىندە نامىسى بار، قازاق دەگەن قانى بار ءاربىر ازامات: "بۇل – مەنىڭ قازاقستانىم!" دەپ تۋ ۇستاپ ۇرانداپ كوتەرىلىسكە شىعۋعا ءتيىس. قان قىزدى، كوزدەن پارلاپ جاس اقتى. ال، مەنىڭ قولىمنان نە كەلەدى؟ اۋەلى وزىڭنەن باستاشى، ءشامشى! جۇرەگىڭدەگى وتىڭ، جانىڭداعى جالىنىڭ قايدا؟ جامان قاتىننىڭ جانىندا جانتايىپ جاتا بەرمەكسىڭ بە؟ تۇر، ورنىڭنان! ءبىر ءوزىڭ ءبىر ارمياداي كوتەرىل… مارش… مارش جاز!"

"مەنىڭ قازاقستانىم" – وسىنداي تولعانىستان تۋعان تاعدىرلى ءان. بارشا قازاقتىڭ رۋحىن وياتىپ، نامىسىن قايراعان ءاندى 1986 جىلى "قازاقتى قازاق قانا باسقارسىن" دەگەن ۇرانمەن الاڭعا شىققان جەلتوقسانشىلار دا، 2022 جىلى قاڭتاردا نارازىلىققا شىققان تاۋەلسىز قازاقستاندىقتار دا شىرقادى. بۇل ءان بيىك تۇعىرلاردا دا، قاندى الاڭداردا دا ايتىلدى. بۇل – ىزا مەن كەكتىڭ جىرى ەمەس، ەگەمەندى ەل بولۋدى اڭساعان قازاقتىڭ ماڭگىلىك ۇرانى.

ءاننىڭ العاشقى شۋماعىنان كەيىن قايىرماسىنداعى "تۋعان جەرىم مەنىڭ قازاقستانىم" دەگەن تارماق شىققاندا جۇمەكەن ناجىمەدەنوۆ پەن ءشامشى قالداياقوۆ "وي، دوڭگەلەنگەن دۇنيە-اي! اينالايىن سەنەن. ءان تۋدى عوي! ءان تۋدى. مارش كەلدى عوي الەمگە. دۇڭكىلدەگەن، تارسىلداعان، سارتىلداعان! بۇل ميلليون قول، ميلليون اياقتىڭ ءجۇرىسى عوي. بۇل ەلىن سۇيگەن، جەرىن سۇيگەن ازاماتتاردىڭ اياق باسۋلارى عوي. بۇل – نامىستىڭ، اردىڭ ءانى عوي" – دەپ تەبىرەنگەن ەكەن.

الايدا ءانۇران وزگەرىسكە ۇشىراپ، العاشقى نۇسقاسىنداعى "مەنىڭ جەرىم" دەگەن سوزدەر "مەنىڭ ەلىمە" اۋىستى. جەرى جوق جەتىم حالىق ەمەسپىز. اقتابان شۇبىرىندى، القاكول سۇلامادان باستاپ، كەشەگى جەلتوقسان كوتەرىلىسىنە دەيىنگى ارالىقتا تاۋەلسىزدىك ءۇشىن كۇرەسكەن بارشا قازاقتىڭ قانىمەن شەكارامىز شەگەندەلدى، تاۋەلسىز ەل بولدىق. الايدا قازاق جەرىنىڭ تۇتاستىعىنا كوز الارتا قاراۋشىلار كوبەيگەن بۇگىنگى بەيبىت زاماندا تۋعان جەردىڭ كىمدىكى ەكەنىن ەستە ۇستاۋ كەرەك–اق.