تۇركيا پرەزيدەنتى رەدجەم ەردوعان كاحرامانماراش پەن گازيانتەپتە جەر سىلكىنىسىنەن زارداپ شەككەندەرگە جاڭا ۇيلەردىڭ كىلتىن تابىستادى. مەملەكەت باسشىسى گازيانتەپتە جوسپارلانعان 50 مىڭ پاتەرگە قوسىمشا تاعى 50 مىڭ پاتەر سالىناتىنىن مالىمدەدى. 

"اپات بولعان ايماقتا 507 مىڭ پاتەر مەن 143 مىڭ جەكە ءۇي سالىنادى. ونىڭ 319 مىڭى 1 جىل ىشىندە بەرىلەدى. 60 مىڭ پاتەردىڭ ىرگەتاسى قالاندى. ۇزدىكسىز جۇمىس ءجۇرىپ جاتىر. ءبىزدىڭ مىندەتىمىز – جەر سىلكىنىسىنەن زارداپ شەككەن ازاماتتاردى جاڭا ۇيلەرگە تەز ارادا قونىستاندىرۋ"، – دەدى تۇركيا پرەزيدەنتى.

وسىعان دەيىن ەردوعان تۇركيالىقتارعا گاز مەن ىستىق سۋ ءبىر جىل بويى تەگىن بەرىلەتىنىن مالىمدەگەن بولاتىن. ونىڭ ايتۋىنشا، تۇركيا حالقى ءبىر اي ىشىندە ءۇي شارۋاشىلىعى گازگا تولەم جاساۋدان بوساتىلادى.

ەسكە سالا كەتەيىك، 14 مامىر كۇنى تۇركيادا پرەزيدەنت سايلاۋى وتەدى. بەلسەندىلەر ەردوعاننىڭ بۇل شەشىمدەرىن سايلاۋ الدى ناۋقانمەن بايلانىستىرادى.  

دەرەككوز: انادولى اگەنتتىگى