باق-تا  پارلامەنتتىك سايلاۋدىڭ داۋىس بەرۋ قورىتىندىلارى تۋرالى جالعان حاتتامالار سۋرەتى تاراپ كەتكەن. اتالعان سۋرەت الەۋمەتتىك جەلىدە قىزۋ تالقىلانۋدا.

ءبىر مانداتتى سايلاۋ وكرۋگى بويىنشا № 4 وكرۋگتىڭ № 99 سايلاۋ ۋچاسكەسىنىڭ ءماجىلىس دەپۋتاتتارىنا داۋىس بەرۋ قورىتىندىلارى تۋرالى ۋچاسكەلىك سك حاتتامالارىنىڭ فوتوسۋرەتتەرى ءبىر كۇن بۇرىن ب ا ق تا تاراپ كەتتى. الايدا الماتى قالالىق اۋماقتىق سايلاۋ كوميسسياسى ونىڭ جالعان ەكەنىن ايتتى.

اسك دا تۇسىندىرىلگەندەي، بىرىنشىدەن، جاريالانعان فوتوسۋرەتتەردە قازاقستان رەسپۋبليكاسى ورتالىق سايلاۋ كوميسسياسىنىڭ 2023 جىلعى 20 قاڭتارداعى № 18/672 قاۋلىسىنا № 32 قوسىمشاعا سايكەس حاتتاما تولتىرىلعان. قۇجاتتىڭ مازمۇنىندا ساياسي پارتيالاردىڭ اتاۋلارىنىڭ ورنىنا ءنومىرى ءتورتىنشى ءبىر مانداتتى اۋماقتىق سايلاۋ وكرۋگى بويىنشا سايلانعان قازاقستان رەسپۋبليكاسىنىڭ پارلامەنتى ءماجىلىسىنىڭ دەپۋتاتتىعىنا كانديداتتار كورسەتىلگەن.

ەكىنشىدەن، حاتتامانىڭ ءتۇپنۇسقاسى ورتالىق سايلاۋ كوميسسياسىنىڭ 2023 جىلعى 20 قاڭتارداعى № 18/672 قاۋلىسى بويىنشا راسىمدەلەدى. ال ب ا ق تاعى سۋرەتتە 28 كانديداتتىڭ ورنىنا تەك 6 ۇمىتكەردىڭ ءاتى-جونى كورسەتىلگەن.

ۇشىنشىدەن،  سايلاۋ كۇنى ۋچاسكەدە وتاندىق جانە شەتەلدىك ب ا ق وكىلدەرى مەن حالىقارالىق ۇيىمداردىڭ، ساياسي پارتيالاردىڭ 5 باقىلاۋشىسى بولعان. سونىمەن قاتار ۇمىتكەرلەر وزدەرىنىڭ سەنىمدى وكىلدەرىن دە سايلاۋ پرسەسسىن باقىلاۋعا جىبەرگەن.

قازاقستان رەسپۋبليكاسىنىڭ سايلاۋ تۋرالى كونستيتۋسيالىق زاڭىنىڭ 43 بابىنىڭ 8 تارماعىنا سايكەس، سايلاۋ كەزىندە  داۋىس بەرۋگە قاتىسقان ادامنىڭ ءوتىنىشى بويىنشا وعان كوميسسيا ءتوراعاسى مەن حاتشىسىنىڭ قولدارىمەن جانە سايلاۋ كوميسسياسىنىڭ مورىمەن كۋالاندىرىلعان حاتتاما بەرىلۋى كەرەك. سەنىم بىلدىرىلگەن ادامدار مەن بايقاۋشىلاردىڭ بىردە-بىرەۋى بەلگىلەنگەن تارتىپپەن كۋالاندىرىلعان حاتتامالاردىڭ كوشىرمەلەرىن العان جوق، تىركەۋ جۋرنالىندا  كوشىرمەلەردى الۋ فاكتىسىن راستايتىن باقىلاۋشىلار مەن سەنىم بىلدىرىلگەن ادامداردىڭ قولدارى قويىلماعان.

ءتورتiنشiدەن، حاتتاماعا ەكi ءمور قويىلادى. ولار ءتۇپنۇسقانىڭ كوشiرمەسiندەگi ءمور مەن ۋچاسكەلiك سك ءتوراعاسى مەن حاتشىسىنىڭ قولى قويىلعان ءمور.

بەسىنشىدەن، تاراتىلعان فوتوسۋرەتتە كوميسسيا مۇشەلەرىنىڭ قولدارىنان باسقا قول قويىلعان. سونداي اق، قۇجاتتاعى ءمور دۇرىس كورىنبەگەندىكتەن، ونىڭ قانداي ءمور ەكەنىن، قاي ۋچاسكەگە تيەسىلى ەكەنىن انىقتاۋ مۇمكىن ەمەس.

«جوعارىدا ايتىلعانداردى ەسكەرسەك، فوتوسۋرەتتەگى №99 ۋچاسكەلىك سايلاۋ كوميسسياسىنىڭ حاتتاماسى ەمەس. بۇل ارەكەتتى سايلاۋ ناتيجەلەرىن بۇرمالاۋ مەن ديسكرەديتاسيالاۋ دەپ سانايمىز. وسىعان بايلانىستى، الماتى قالاسىنىڭ اۋماقتىق سايلاۋ كوميسسياسى حالىقتى الداماۋ ءۇشىن تەك شىنايى اقپارات تاراتۋعا شاقىرادى»، - دەپ قورىتىندىلادى اسك.

سونداي-اق، اۋماقتىق سايلاۋ كوميسسياسى جالعان اقپارات تاراتقانداردى جاۋاپكەرشىلىككە تارتۋ ءۇشىن قۇقىق قورعاۋ ورگاندارىنا جۇگىنەتىندەرىن ايتتى.