اباي وبلىسىندا جاستارعا شاعىن نەسيە بەرۋ باعدارلاماسى بويىنشا وتىنىمدەر قابىلداۋدا. 

مەملەكەت باسشىسى قاسىم-جومارت كەمەل ۇلى توقايەۆتىڭ تاپسىرماسى اياسىندا «اگرارلىق نەسيە كورپوراسياسى» اق جاستارعا شاعىن نەسيە بەرۋ باعدارلاماسى بويىنشا وتىنىمدەر قابىلداۋدى جالعاستىرۋدا. وتىنىمدەردى قابىلداۋ بيىلعى جىلدىڭ  ناۋرىز ايىنان باستالدى جانە وسى ارالىقتا اباي وبلىسى بويىنشا جاس كاسىپكەرلەردەن جەڭىلدەتىلگەن جىلدىق 2،5 پايىزبەن ميكروكرەديت الۋعا 86 ءوتىنىش كەلىپ تۇسكەن.

اتاپ ايتساق، 71 ءوتىنىم مال شارۋاشىلىعىن، 9 ءوتىنىش قىزمەت كورسەتۋ سالاسىن، 3 ءوتىنىش ساۋدا، 3 ءوتىنىش جەڭىل ونەركاسىپ سالاسىن قارجىلاندىرۋ بويىنشا تۇسكەن. 2023 جىلى اباي وبلىسى بويىنشا كەمىندە 211 نەسيە بەرۋ جوسپارلانۋدا. بۇل ماقساتتا 1 ملرد. 55 ملن. تەڭگە بولىنگەن.

– ميكروكرەديتتەر 5 جىلدان اسپايتىن مەرزىممەن (مال شارۋاشىلىعى سالاسىنداعى جوبالار ءۇشىن 7 جىلعا دەيىن) جەكە كاسىپكەر رەتىندە تىركەلگەن  21 جاستان 35 جاسقا دەيىنگى جاستارعا ءوز ءىسىن اشۋ نەمەسە كەڭەيتۋ ءۇشىن بەرىلەدى. بۇل رەتتە قاتىسۋشىلاردىڭ جاسى «اگرارلىق كرەديتتىك كورپوراسيا» اق-عا وتىنىممەن جۇگىنگەن كەزدە ەسكەرىلەدى. اينالىم قاراجاتىن تولتىرۋعا بەرىلەتىن نەسيەنىڭ مەرزىمى – 24 ايعا دەيىن، كوكتەمگى ەگىس جانە ەگىن جيناۋ جۇمىستارىن قارجىلاندىرۋ مەرزىمى - 36 ايعا دەيىن. اينالىم قاراجاتىن 100 پايىز تولتىرۋعا رۇقسات بەرىلمەيدى، نەسيەنىڭ ءبىر بولىگى عانا باعىتتالۋى مۇمكىن، – دەيدى «اگرارلىق نەسيە كورپوراسياسى» اق-نىڭ  اباي وبلىستىق فيليالىنىڭ نەسيە ءبولىمىنىڭ باسشىسى تيمۋر اكاتايەۆ.

كەپىل رەتىندە رەسپۋبليكالىق، وبلىستىق ماڭىزى بار قالالاردا، اۋدان ورتالىقتارىندا، وبلىستىق جانە اۋداندىق باعىنىستى قالالاردا جانە وزگە دە ەلدى مەكەندەردە ورنالاسقان جىلجىمايتىن مۇلىك، ەگىستىك جەر جانە ارنايى تەحنيكا قاراستىرىلادى. قارىز الۋشىلارعا قويىلاتىن نەگىزگى تالاپتاردىڭ ءبىرى – نەسيە تاريحىنىڭ جاقسى بولۋى. وتكەن ەكى جىلدا وتەلمەگەن نەسيە مەرزىمى 180 كۇننەن اسپاۋى كەرەك.

نەسيەنى قارجىلاندىرۋ تۋرالى شەشىمدى وبلىس اكىمدىگى جانىنان قۇرىلعان كونكۋرستىق كوميسسيا شىعارادى. كوميسسيا جۇمىسى 26 ساۋىردەن باستالدى. بۇگىن وتكەن العاشقى وتىرىستا 10 ءوتىنىش قارالىپ، ۇمىتكەرلەر ءوز بيزنەس جوبالارىن تانىستىردى. بيزنەس-جوسپاردى باعالاۋ پاراعىنا سايكەس جوعارى ۇپاي جيناعان كاسىپكەرلەردىڭ جوبالارى قارجىلاندىرىلاتىن بولادى.

كوميسسياعا العاشقى بولىپ جوباسىن ۇسىنعانداردىڭ ءبىرى جارما اۋدانى ارشالى اۋىلىنان كەلگەن 25 جاستاعى كاسىپكەر – قۋانىشبەك جەلدىبايەۆ.

– اۋىلدا ءوز قوجالىعىم بار. ءوز ءىسىمدى بيىل اقپان ايىندا باستادىم. 4 ملن. 900 مىڭ تەڭگەگە 14 باس ءىرى قارا مال ساتىپ الۋ ءۇشىن جەڭىلدەتىلگەن نەسيەگە ءوتىنىم بەرىپ وتىرمىن. اۋىلدا وسكەندىكتەن، مالدىڭ جاي-كۇيىن بىلەمىن. وعان قوسا شاكارىم ۋنيۆەرسيتەتىندە ۆەتەريناريا ماماندىعىندا ءبىلىم العانمىن. اۋىلدا ۆەتەرينار رەتىندە دە جۇمىس ىستەيمىن. بۇل باعدارلامادا  نەسيە مولشەرلەمەسىنىڭ تومەن بولۋى جاستار ءۇشىن وتە ءتيىمدى، – دەيدى قۋانىشبەك جەلدىبايەۆ.

اباي وبلىسىنىڭ جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسى باسشىسىنىڭ ورىنباسارى ايمان نۇرلىبەكتىڭ ايتۋىنشا، الدىمەن، بيزنەس-جوسپارلاردىڭ ءوڭىردىڭ الەۋمەتتىك-ەكونوميكالىق دامۋىنا قوساتىن ۇلەسى باعالانادى.

ايتا كەتەيىك، كوميسسيانىڭ كەلەسى وتىرىسى مامىر ايىنىڭ ورتاسىنا  جوسپارلانعان.

قازىرگى ۋاقىتتا اباي وبلىسى بويىنشا شاعىن نەسيە الۋعا وتىنىمدەر سەمەي قالاسى، مۇحامەدحانوۆ كوشەسى، 23 ا مەكەنجايىندا ورنالاسقان «اگرارلىق نەسيە كورپوراسياسى» اق-نىڭ اباي وبلىسى بويىنشا فيليالىندا قابىلدانۋدا.