سوتتالعان قوعام بەلسەندىسى جانبولات مامايدىڭ جۇبايى ينگا يمانباي بۇۇ-نىڭ قازاقستان ۇكىمەتىنە ۇندەۋ جولداعانىن حابارلادى. ينگا يمانباي تىركەلمەگەن دەمپارتيا جەتەكشىسىنىڭ ىسىنە قاتىستى بۇۇ ەسەبىن جاريالادى.
سونداي-اق، بۇۇ ءجونسىز ۇستاۋلار جونىندەگى جۇمىس توبى قازاقستان ۇكىمەتىنە ۇندەۋ جاساعان.
"جۇمىس توبى قازاقستان ۇكىمەتىنەن ماماي مىرزانىڭ جاعدايىن دەرەۋ تۇزەتۋدى جانە ونى ءتيىستى حالىقارالىق نورمالارعا، ونىڭ ىشىندە ادام قۇقىقتارىنىڭ جالپىعا بىردەي دەكلاراسياسىندا جانە ازاماتتىق جانە ساياسي قۇقىقتار تۋرالى حالىقارالىق پاكتىدە باياندالعان نورمالارعا سايكەس كەلتىرۋ ءۇشىن قاجەتتى شارالار قابىلداۋدى سۇرايدى"، –دەلىنگەن جازبادا.
سونىمەن بىرگە، بۇۇ وكىلدەرى قازاقستان ۇكىمەتىنە جانبولات مامايدىڭ وتەماقى تالاپ ەتۋىنە قۇقىعى بولۋى كەرەگىن دە ەسكە سالادى. بۇل ەسەپ بويىنشا ق ر ۇكىمەتى بۇۇ-عا التى ايدىڭ ىشىندە جاۋاپ بەرۋى قاجەتتىگىن ايتا وتىرىپ، ولاي بولماعان جاعدايدا ءوز تاراپىنان ارەكەتتەر جاسالاتىنىن دا كورسەتتى.
“ءبىر سوزبەن ايتقاندا، بۇۇ جانبولات مامايعا اراشا ءتۇستى دەگەن ءسوز! ونى قۋدالاۋدىڭ ءجونسىز ءارى حالىقارالىق نورمالارعا قايشى ەكەنىن باسا ايتتى. بۇل ءسوزسىز، ۇلكەن جەڭىس! بيلىك بۇۇ جۇمىس توبىنىڭ، باسقا دا بەدەلدى حالىقارالىق ۇيىمداردىڭ تالاپ تىلەگىن ەسكەرۋسىز قالدىرماۋى ءتيىس دەپ سانايمىز. جانبولات ماماي دەرەۋ اقتالىپ، بوستاندىققا شىعۋى كەرەك!”، – دەدى ينگا يمانباي.
پىكىر قالدىرۋ