الماتى وبلىسىندا جاۋرىنى جەرگە تيمەگەن بالۋاندار بەلدەسۋى ءوتتى، دەپ حابارلايدى وڭىرلىك باسپا ءسوز قىزمەتى.

«الاتاۋ ارلانى» دەپ اتالعان بىلەكتىلەر دوداسى «قازاقستان بارىسى» رەسپۋبليكالىق تۋرنيرىنە جولدامانى ساراپقا سالۋ ءۇشىن ۇيىمداستىرىلعان.

اتالعان جارىستىڭ اشىلۋ سالتاناتىنا وبلىس اكىمى مارات سۇلتانعازييەۆ قاتىسىپ، سپورتشىلارعا ساتتىلىك تىلەدى.

«الماتى وبلىسى بىلەكتى دە، جۇرەكتى بالۋاندارعا كەندە ەمەس. تۇڭعىش قازاقستان بارىسى ۇلان رىسقۇل دا ءبىزدىڭ ءوڭىردىڭ تۋماسى ەكەنى بارشامىزعا ءمالىم. بىلتىر «قازاقستان بارىسى» جوباسى ءوزىنىڭ 10 جىلدىق مەرەيتويىن اتاپ ءوتتى. وسى جىلدار بويى الماتى وبلىسى ءدۇبىرلى دوداعا ءوزىنىڭ ءاپايتوس بالۋاندارىن قوسىپ كەلەدى. ال، وڭىردەگى كىل مىقتىدان كىم مىقتى ەكەنى ءدال وسى «الاتاۋ ارلانى» سايىسىندا انىقتالادى.
سوندىقتان، قاتىسۋشىلارعا ساتتىلىك تىلەي وتىرا، رەسپۋبليكالىق دەڭگەيدە الماتى وبلىسىنىڭ مەرەيىن اسقاقتاتىن، ناعىز شەبەر جەڭىسكە جەتسىن دەيمىن»،-دەدى ايماق باسشىسى مارات ەلەۋسىز ۇلى.

قونايەۆ قالاسىنىڭ ورتالىق الاڭىندا وتكەن تۋرنيرگە ايماقتىڭ تۇكپىر-تۇكپىرىنەن سالماعى 90 كەلىدەن جوعارى 28 بالۋان قاتىستى. ولاردىڭ بارلىعى ءوز وڭىرلەرىندە ۇزدىك ۇشتىكتەن كورىنگەن سپورتشىلار. ايتا كەتەيىك، الىپتار سايىسىنىڭ وتۋىنە الماتى وبلىسى دەنە شىنىقتىرۋ جانە سپورت باسقارماسى مەن بۇقارالىق-سپورتتىق ءىس-شارالار وتكىزۋ ورتالىعى مۇرىندىق بولدى.

ساعاتتار بويى بوز كىلەمدە بەلدەسكەن بالۋاندار وبلىستىڭ دارابوزدارىن انىقتادى. جارىس قورىتىندىسىنا كەلەر بولساق، قارسىلاستارىن تىزە بۇكتىرگەن، «الاتاۋ ارلانى» اتانعان قونايەۆ قالاسىنىڭ اتىنان بوز كىلەمدە بەلدەسكەن ءمادي ەدىلبايەۆ التىن بەلبەۋدىڭ يەسى اتانىپ، 5 000 000 تەڭگە اقشالاي سىيلىققا يە بولدى. رەسپۋبليكالىق تۋرنيدە ءمادي ەدىلبايەۆا الماتى وبلىسىنىڭ نامىسىن قورعايتىن بولادى.

ال، ەڭبەكشىقازاق اۋدانىنىڭ اتىنان شىققان بالۋان،نۇرعالي جولتايەۆ ەكىنشى ورىن الىپ، 1 000 000 تەڭگەگە سەرتيفيكاتكا يە بولسا، جۇلدەلى ءۇشىنشى ورىنعا بالقاش اۋدانىنان كەلگەن ءالىمجان جۇماحمەتوۆ تابان تىرەدى. ول 500 000 تەڭگەگە اقشالاي سىيلىققا يە بولدى. بارشا جەڭىس تۇعىرىنان كورىنگەن سپورتشىلارعا ارنايى ديپلومدار تابىستالدى. وسىلايشا، وبلىستىڭ ارلاندارى لايىقتى تۇعىرىنان كورىندى.