بۇگىن الماتىداعى بوستاندىق اۋداندىق №2 سوتى قاڭتار وقيعاسىندا ايىپتالعان 25 ادامعا سوت ۇكىمىن شاعاردى.  

سوت قاڭتاردا قازا بولعان دۋمان قاناتبەكتەن باسقا ايىپتالۋشىلاردىڭ بارلىعىنا شارتتى جازا بەردى. "قاماۋدا بولعانداردىڭ بارلىعى بوساتىلدى" – دەپ حابارلادى ادۆوكات اينارا ايدارحان.

بۇعان دەيىن پروكۋرور ايىپتالۋشىلارعا 2–4 جىل ارالىعىندا  باس بوستاندىعىنان ايىرۋمەن قاتار شارتتى جازا سۇراعان. ايىپتالۋشىلارعا "جاپپاي تارتىپسىزدىكتى ۇيىمداستىردى جانە وعان قاتىستى"، "قارۋ–جاراق ۇرلادى"، "عيماراتتارعا شابۋىل جاسادى" دەگەن ايىپتار تاعىلعان. ازاتتىق راديوسىنىڭ حابارلاۋىنشا، ايىپتالۋشىلاردىڭ كەيبىرى ايىپتى ءىشىنارا مويىنداعان، كەيبىرى كەلىسپەگەن.

سونداي–اق، سوت وتىرىسى باستالماي تۇرىپ جينالعان حالىق زالعا سىيماي، سوتتان ۇلكەن زالدى بەرۋدى، ءادىل ۇكىم شىعارۋدى تالاپ ەتىپ ۇرانداتقان.