سىبايلاس جەمقورلىققا قارسى ءىس-قيمىل اگەنتتىگى ەكس-دەپۋتات نۇرجان التايەۆتىڭ ۇستالۋىنا قاتىستى مالىمەت بەردى.
انتيكوردىڭ جاسىرىن ءىس-شارالار كەشەنىنىڭ ناتيجەلەرى بويىنشا نۇرجان التايەۆتى اسا اۋىر جەمقورلىق قىلمىس جاسادى دەگەن كۇدىك بويىنشا ۇستاعانىن مالىمدەدى.
“7 ماۋسىمدا سىبايلاس جەمقورلىققا قارسى قىزمەت جاسىرىن ءىس-شارالار كەشەنىنىڭ ناتيجەلەرى بويىنشا ەكس-ۆيسە-مينيستر ن.ب. التايەۆتى اسا اۋىر جەمقورلىق قىلمىس جاسادى دەگەن كۇدىك بويىنشا ۇستادى. ن.ب. التايەۆ ەڭبەك جانە الەۋمەتتىك قورعاۋ ۆيسە-مينيسترى، كەيىننەن ق ر پارلامەنتى ءماجىلىسىنىڭ دەپۋتاتى رەتىندە جۇيەلى نەگىزدە «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ا.ي. مىرزاحمەتوۆتەن اسا ءىرى مولشەردە پارا الدى دەپ كۇدىكتەنەدى”، – دەلىنگەن حابارلامادا.
ۆەدومستۆو مالىمەتىنشە، 2018-2020 جىلدارى التايەۆ لاۋازىمىن اسىرا پايدالانعان. ول ا.ي.مىرزاحمەتوۆتىڭ ۇيىمىنا مەملەكەتتىك تاپسىرىستار الۋىنا ىقپال جاساپ، قامقورشىلىق كورسەتكەن. ءقازىر نۇرجان التايەۆ استانا قالاسى پوليسيا دەپارتامەنتىنىڭ ۋاقىتشا ۇستاۋ يزولياتورىنا قامالعان. وزگە اقپارات تەرگەۋ مۇددەسى ءۇشىن وزگە اقپارات جاريالانبايدى.
ەسكە سالا كەتەيىك، 2020 جىلى جەلتوقساندا ءماجىلىستىڭ بۇرىنعى دەپۋتاتى نۇرجان التايەۆ ءوزىنىڭ El-Tiregi پارتياسىن قۇراتىنىن مالىمدەگەننەن كەيىن NurOtan پارتياسىنان شىعارىلعان بولاتىن.
وتكەن سايلاۋدا ول دەپۋتاتتىق ماندات ءۇشىن كۇرەسۋگە تىرىسىپ، كانديداتۋراسىن ۇسىنعان بولاتىن. الايدا 2022 جىلعى 12 قازاندا قازاقستان وسك نۇرجان التايەۆتىڭ كانديداتتارعا قويىلاتىن تالاپتارعا سايكەستىگىن بەلگىلەۋ ءراسىمىن توقتاتقانىن حابارلادى
پىكىر قالدىرۋ