استانا قالاسى بويىنشا سىبايلاس جەمقورلىققا قارسى قىزمەت استانا قالاسى پوليسيا دەپارتامەنتىنىڭ جول-پاترۋلدىك قىزمەتى روتاسىنىڭ كومانديرى الماز قۇلتانوۆ قاتىستى سوتقا دەيىنگى تەرگەۋ جۇرگىزۋدە. ول پارا بەرۋگە جاردەم ەتتى دەگەن كۇدىككە ىلىنگەن.
“لاۋازىمدى ادام ازاماتتىق ءىس بويىنشا وڭ شەشىم قابىلداعانى ءۇشىن پروكۋراتۋرا جانىنداعى ماتەريالدىق-تەحنيكالىق قامتاماسىز ەتۋ باسقارماسىنىڭ بۇرىنعى قىزمەتكەرى «ج» ازاماتى ارقىلى سوت جۇيەسىنىڭ قىزمەتكەرلەرىنە ءىرى مولشەردە پارا بەرۋگە جاردەمدەستى دەپ كۇدىكتەنەدى.«ج» ازاماتى پروكۋراتۋرادا اكىمشىلىك لاۋازىمدى اتقارا وتىرىپ، جەدەل قىزمەتكەر بولماعان. قىلمىس جاساۋ كەزىندە جۇمىسسىز بولعان”، – دەلىنگەن ۆەدومستۆو حابارلاماسىندا.
8 ماۋسىمدا تەرگەۋ سوتىنىڭ سانكسياسىمەن اتالعان ادامدار قاماۋعا الىندى. سوتقا دەيىنگى تەرگەپ-تەكسەرۋ جالعاسۋدا.
بۇدان بۇرىن استانا سوتى قۇلتانوۆتىڭ 2 ايعا قامالعانىن حابارلاعان.
ايتا كەتەيىك، الماز قۇلتانوۆ 2021 جىلى اياعى اۋىر كەلىنشەكتى قۇتقارعانى ءۇشىن سول كەزدەگى ءىىم باسشىسى ەرلان تۇرعىمبايەۆتىڭ قولىنان ماراپات العان.
پىكىر قالدىرۋ