قاسىم-جومارت توقايەۆ ۋكراينا مەن رەسەي سوعىسىنا قاتىستى قازاقستاننىڭ ۇستانىمىن ايتتى. بۇل تۋرالى ول اقوردادا گەرمانيا پرەزيدەنتى فرانك-ۆالتەر شتاينمايەرمەن كەلىسسوزدەردەن كەيىنگى ب ا ق وكىلدەرىنە بىرلەسكەن مالىمدەمە بارىسىندا مالىمدەدى.
توقايەۆتىڭ ايتۋىنشا، قازاقستان ۋكراينا مەن رەسەي اراسىنداعى سوعىستى توقتاتۋ ءۇشىن ءوز ۇلەسىن قوسۋعا دايىن.
"مەن بۇل كۇردەلى ماسەلەگە قاتىستى ۇستانىمىمىزدى ايقىندادىم. بىرىنشىدەن، ءبىز بۇۇ جارعىسىن قاتاڭ ساقتاۋىمىز كەرەك. ارينە، بىرىككەن ۇلتتار ۇيىمىن الەمدە تەڭدەسى جوق ءارى امبەباپ ۇيىم رەتىندە قولداۋعا ءتيىسپىز.ەكىنشىدەن، ءبىز قىتايدىڭ، سونداي-اق باسقا دا مەملەكەتتەردىڭ بارلىق بەيبىت باستاماسىن قولداۋىمىز قاجەت"، – دەدى قاسىم-جومارت توقايەۆ.
بۇدان بولەك، مەملەكەت باسشىسى رەسەي مەن قازاقستان اراسىنداعى بايلانىستى ساقتاپ قالاتىنىن دا اتاپ ءوتتى.
"جاقىن ارادا ۋكرايناداعى قارۋلى قاقتىعىس توقتايدى دەپ ۇمىتتەنەمىز. سودان كەيىن الەمنىڭ وسى بولىگىندە بەرىك بەيبىت ءومىر ورنايتىنى تۋرالى ءسوز قوزعاي الامىز. قازاقستانعا كەلەتىن بولساق، ءبىز وسى ماقساتقا قول جەتكىزۋگە ءوز ۇلەسىمىزدى قوسۋعا دايىنبىز. سونىمەن قاتار ءبىز – رەسەيمەن ستراتەگيالىق سەرىكتەسپىز جانە بىرنەشە ۇيىمنىڭ مۇشەسى ەكەنىمىزدى اتاپ وتكەن ءجون. سوندىقتان ءبىزدىڭ ماقساتىمىز – ەكىجاقتى جانە حالىقارالىق ۇيىمدار اياسىندا ءوزارا ىنتىماقتاستىعىمىزدى نىعايتۋ ءۇشىن رەسەيمەن تىعىز بايلانىستى ساقتاۋ"، – دەدى مەملەكەت باسشىسى.
پىكىر قالدىرۋ