قۇربان ايتتا جاعدايى كەلمەيتىن ازاماتتار قارىزعا قۇرباندىق شالۋدىڭ قاجەتى جوق. بۇل تۋرالى ءدىني باسقارمانىڭ ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ ايتتى.
"قۇربان شالۋ ءۇشىن قارىز الىپ قۇربان شالۋ مىندەت ەمەس. ويتكەنى قۇربان شالۋ ءۇشىن ادامنىڭ جاعدايى بولۋى كەرەك. جاعدايى بار ادام عانا قۇربان شالادى. ال ەندى جاعدايى كەلمەيتىن ادام قارىزدانىپ، قۇرباندىق شالۋ وعان مىندەت ەمەس"، - دەدى مانسۇروۆ ورتالىق كوممۋنيكاسيالار قىزمەتىندە وتكەن بريفينگتە.
سونداي-اق قۇرباندىققا شالۋعا بولمايتىن مالدار تۋرالى دا ايتىپ ءوتتى. باتىرجان مانسۇروۆتىڭ ايتۋىنشا، تومەندەگىدەي سيپاتتاعى مالدار قۇرباندىق شالۋعا جارامسىز بولىپ كەلەدى:
- ءبىر كوزى سوقىر
- سويىلاتىن جەرگە جەتە المايتىن دارەجەدە كوتەرەم
- قۇلاعى نەمەسە قۇيرىعى تۋمادان جوق نەمەسە باسىم بولىگى كەسىلگەن
- تىستەرىنىڭ كوبى ءتۇسىپ قالعان
- ەمشەكتەرىنىڭ باسى جۇلىنىپ قالعان
- ءبىر ءمۇيىزى نەمەسە ەكەۋى دە تۇبىنەن سىنعان.
«قوي، ەشكى، سيىر جانە تۇيە مالدارىن عانا قۇرباندىققا شالۋعا بولادى. قۇربان رەتىندە شالىناتىن قوي جانە ەشكى كەم دەگەندە ءبىر جاسار، سيىر ەكى جاسار، تۇيە بەس جاسار بولۋى كەرەك. التى-جەتى ايلىق توقتى ءبىر جاسار قوي سياقتى سەمىز، ەتتى بولسا، قۇرباندىققا شالۋعا جارايدى. قوي مەن ەشكىنىڭ ەركەگىن، سيىردىڭ ۇرعاشىسىن شالۋ ابزال. ال ەلىك، ارقار سياقتى اڭدار مەن تاۋىق، قوراز، قاز، ۇيرەك سياقتى قۇستار قۇربان رەتىندە سويىلمايدى»، - دەدى مانسۇروۆ.
پىكىر قالدىرۋ