سەنات دەپۋتاتتارى "ونلاين-پلاتفورمالار جانە ونلاين-جارناما تۋرالى" زاڭدى ماقۇلدادى.
وسى زاڭمەن ونلاين-جارناما، ينفليۋەنسەر جانە جالعان اقپارات ۇعىمدارى ەنگىزىلىپ وتىر. بۇدان بولەك، قازاقستاندىق بلوگەرلەر سالىق تولەۋگە مىندەتتەلەدى جانە جالعان اقپارات ءۇشىن جاڭا ايىپپۇل ەنگىزىلەدى. جالعان اقپاراتى كوپ زيان تيگىزبەسە، 20 اەك (69 000 تەڭگە) مولشەرىندە ايىپپۇل سالىنادى. ال وسى ارەكەتتى قايتالانعان جاعدايدا ايىپپۇلدىڭ كولەمى ەكى ەسەگە ارتادى. زاڭدى تۇلعالار دا ءتيىستى تارتىپپەن جازاعا تارتىلادى.
جالپى، وسى زاڭ اياسىندا قىلمىستىق جانە كاسىپكەرلىك كودەكستەرگە، "جارناما تۋرالى"، "اقپاراتتاندىرۋ تۋرالى"، "ءبىلىم تۋرالى" جانە "قازاقستان رەسپۋبليكاسىنداعى بالانىڭ قۇقىقتارى تۋرالى" زاڭدارعا وزگەرىستەر ەنگىزىلەدى. ماسەلەن، قىلمىستىق كودەكستىڭ الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرعانى ءۇشىن، سونداي-اق كورىنەۋ جالعان اقپارات تاراتقانى ءۇشىن قىلمىستىق جاۋاپتىلىقتى بەلگىلەيتىن باپتاردا "ونلاين-پلاتفورمالاردى پايدالانا وتىرىپ جاسالعان ارەكەتتەر" دە ەسكەرىلەدى.
بۇگىن سەنات وسى زاڭدى بىردەن ەكى وقىلىمدا ماقۇلدادى. قۇجات پرەزيدەنتتىڭ قول قويۋىنا جىبەرىلدى.
پىكىر قالدىرۋ