1 شىلدەدە 2022 جىلعى 1 قىركۇيەككە دەيىن اكەلىنگەن شەتەلدىك اۆتوكولىكتەردى زاڭداستىرۋعا ءوتىنىم قابىلداۋ توقتاتىلدى.
"ق ر ءىىم باسقا مەملەكەتتىك ورگاندارمەن ءوزارا ءىس-قيمىل جاساپ، 23 قاڭتاردان باستاپ ەلگە 2022 جىلعى 1 قىركۇيەككە دەيىن اكەلىنگەن شەتەلدىك اۆتوكولىكتەردى زاڭداستىرۋدى جۇرگىزدى. 1 شىلدەدە زاڭداستىرۋعا ءوتىنىم قابىلداۋ توقتاتىلدى. وسى ارالىقتا 196 مىڭ اۆتوكولىك زاڭداستىرىلدى"، - دەدى ىشكى ىستەر مينيسترلىگى باسپا ءسوز قىزمەتىنىڭ وكىلى شۇعىلا تۇرلىبەك اپتالىق بريفينگىدە.
سونداي-اق قازاقستاندىق ەسەپكە 12 مىڭنان استام كونسترۋكتور-اۆتوكولىك قويىلدى.
"1 شىلدەگە دەيىن ءوتىنىم بەرگەن بارلىق ازاماتتارعا اۆتوكولىكتەرى زاڭداستىرۋعا قويىلاتىن تالاپتارعا سايكەس كەلگەن جاعدايدا، زاڭداستىرۋ قۇقىعى بەرىلەدى.
ەاەو ەلدەرىندە بۇرىنعى تىركەلگەن جەرى بويىنشا ەسەپتەن شىعارىلماعان جانە وسى سەبەپتى زاڭداستىرىلماعان اۆتوكولىكتەرگە كەلسەك، ولاردىڭ يەلەرى كولىكتى كەرى اكەتەدى. ال ەگەر باسقا ەلدەگى بۇرىنعى تىركەۋ ورنىنان ەسەپتەن شىعارىلسا، قازاقستاندا كەيىننەن باستاپقى تىركەۋ تۋرالى مىندەتتەمە جانە 5 جىلعا قازاقستاندا ۋاقىتشا ەسەپكە قويۋ قۇقىعى بەرىلمەك"، - دەپ ءتۇسىندىردى رەسمي وكىل.
ۋاقىتشا ەسەپكە قويۋ كەزىندە كولىك قۇرالىن تىركەۋ تۋرالى كۋالىك جانە ق ر مەملەكەتتىك نومىرلىك بەلگىلەرى بەرىلەدى.
تىركەۋ تۋرالى كۋالىكتە «ۋاقىتشا ەسەپكە الۋ، يەلىكتەن شىعارۋ جانە قازاقستان رەسپۋبليكاسىنان تىس جەرلەرگە شىعۋ قۇقىعىنسىز» دەگەن جازبالار كورسەتىلەدى.
شەت مەملەكەتتىڭ تىركەۋ قۇجاتتارى مەن مەملەكەتتىك نومىرلىك بەلگىلەرى "ازاماتتارعا ارنالعان ۇكىمەت" مەملەكەتتىك كورپوراسياسىندا ساقتاۋعا تاپسىرىلادى.
"ەگەر قازاقستان ازاماتتارى اتالعان اۆتوكولىكتەردى ەلدەن تىس جەرلەرگە اكەتۋدى شەشسە، ولار ق ر تىركەۋ قۇجاتتارى مەن مەملەكەتتىك نومىرلەرىن تاپسىرۋى كەرەك، سودان كەيىن ولارعا شەت مەملەكەتتىڭ تىركەۋ قۇجاتتارى مەن مەملەكەتتىك نومىرلەرى قايتارىلادى. ال اۆتوكولىك بۇرىنعى تىركەلگەن ەلىندە ەسەپتەن شىعارىلسا جانە قازاقستان ازاماتتارى ولاردى قازاقستاندا باستاپقى تىركەۋدى ۇيعارسا، ۋتيل الىمىنسىز، باستاپقى تىركەۋ ءۇشىن 200 000 تەڭگە تولەيدى"، - دەدى شۇعىلا تۇرلىبەك.
پىكىر قالدىرۋ