كوممۋنالدىق سالا قىزمەتكەرلەرىنىڭ جالاقىسى 135 مىڭ تەڭگەدەن 200-300 مىڭ تەڭگەگە دەيىن وسەدى. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ مالىمدەدى.
ونىڭ ايتۋىنشا، كوممۋنالدىق كاسىپورىندار قىزمەتىنىڭ تيىمدىلىگىن ارتتىرۋ ءۇشىن "تابيعي مونوپوليالار تۋرالى" زاڭنىڭ 22-بابىنا وزگەرىستەر ەنگىزىلگەن. سونىڭ ءبىرى – كوممۋنالدىق سالا قىزمەتكەرلەرىنىڭ، ياعني سانتەحنيك، ەلەكتريك، دانەكەۋشىلەردىڭ جالاقىسىن 50%-تەن 100%-كە دەيىن كوتەرۋ.
"وسىلايشا، ورتاشا جالاقى سالا مەن وڭىرگە بايلانىستى 135 مىڭ تەڭگەدەن 200-300 مىڭ تەڭگەگە دەيىن وسەدى. بۇل تۇرعىن ۇي-كوممۋنالدىق شارۋاشىلىق سالاسىنداعى 200 مىڭعا جۋىق جۇمىسشىعا اسەر ەتەدى"، - دەدى قۋانتىروۆ ۇكىمەت وتىرىسىندا.
ەكىنشىسى – يەسىز جەلىلەردى كەزەڭ-كەزەڭىمەن بەرۋ. وسىلايشا، 25 مىڭ شاقىرىمنان استام كوممۋنالدىق جەلى سەنىمگەرلىك باسقارۋعا جانە كوممۋنالدىق مەنشىككە بەرىلەدى. مينيستر قابىلدانعان تۇزەتۋلەر كوممۋنالدىق كاسىپورىنداردىڭ يەسىز جەلىلەردى ۇستاۋعا جانە پايدالانۋعا جۇمساعان شىعىندارىن وتەۋگە مۇمكىندىك بەرەتىنىن اتاپ ءوتتى.
