ەلىمىزدەگى ەڭ ءىرى IT كومپانيانىڭ ءبىرى Bugin Holding تەك مەكتەپ وقۋشىلارىنا عانا ەمەس، بالاباقشا بۇلدىرشىندەرى ءۇشىن دە جاڭا جوبانى باستادى.

بۇل تۋرالى كومپانيا باسشىسى ايبەك قۋاتباي فەيسبۋك پاراقشاسىندا جازدى.

"Ordagen-گە دەيىنگى تاعى ءبىر ەتاپتى قوسۋ ستراتەگيالىق جوسپارىمىزدا بار ەدى. "ساباقتى ينە ساتىمەن" دەمەكشى، ويعا العان جوسپارىمىز ورىندالىپ كەلە جاتىر.

بۇل - بالاباقشا. ەلىمىزدىڭ بولاشاعى جاستار دەپ جاتامىز. ولار بۇگىندە - ءبۇلدىرشىن. ولارعا بەرىلەتىن تاربيەنىڭ، ءبىلىمنىڭ، قۇندىلىقتاردىڭ ساپاسى كەلەشەكتە ەڭ ماڭىزدى رولدەردى اتقارادى"، - دەيدى ول.

ايبەك قۋاتبايدىڭ جازۋىنشا، Bugin Holding كومپانياسى BabyBoom Education بالاباقشالار جەلىسىنىڭ 43% ۇلەسكەرى اتانعان.

ەسكە سالساق، بۇعان دەيىن كومپانيا مەكتەپ جاسىنا دەيىنگى بالالارعا ارنالعان ونىمدەردى جاقسارتۋ ءۇشىن "ماما" جوباسىنىڭ دا ۇلەسىن العان.

سونىمەن قاتار Bugin Holding ديرەكتورى الداعى جوسپارلارىن دا ءبولىستى.

"ەندىگى جاسالاتىن جۇمىستار ەكى بىردەي جوبانىڭ بىرىگە العا باسۋىنا مۇمكىندىك سىيلايدى:

- مەكتەپكە دەيىنگى ۇيىمداردى باسقارۋدىڭ كەشەندى LMS جۇيەسى جاسالادى؛

- Ordagenء-نىڭ كىتاپتارى مەن ويىندارى وقۋ ۇدەرىسىنە ەنەدى.

Bugin Holding جانە BabyBoom Education اراسىنداعى ىنتىماقتاستىقتىڭ باستى ماقساتى: زاماناۋي اتا-انالاردىڭ قاجەتتىلىكتەرىنە جاۋاپ بەرەتىن جاڭارتىلعان، بىرەگەي ءونىمدى جاساۋ.

BabyBoom Education جاقىن ارادا رەبرەندينگكە يە بولماق. كومپانيا اتاۋى Ordagen Kids بولىپ وزگەرمەك. بۇل بالاباقشالار جەلىسىنە زاماناۋي IT-تەحنولوگيالار ارقىلى وقىتۋعا كوبىرەك كوڭىل بولۋگە، ەتنيكالىق وزىندىك سانانى قالىپتاستىرۋعا، سونداي-اق قازاق ءتىلدى ورتاعا ەنۋگە مۇمكىندىك بەرەدى"، - دەيدى حولدينگ باسشىسى.

ەسكە سالايىق، قازاق جاستارى قۇرعان كومپانيا وتكەن جىلى 2،4 ميلليون دوللار ينۆەستيسيا اكەلگەنى تۋرالى جازعان ەدىك.