اقتوبە وبلىسىندا تۇلكى 4 جاسار بالانى قاۋىپ الدى. تۇلكىنىڭ قۇتىرما اۋرۋىنا شالدىققانى بەلگىلى بولدى، دەپ جازادى "موي گورود". 

وقيعا 4 شىلدە كۇنى بولعان. بالانىڭ اكەسى سول اۋىلدا شارۋا قوجالىعىن باسقارادى. بالا وتباسىمەن بىرگە وزەنگە شومىلۋعا بارعان كەزدە قامىس اراسىنان تۇلكى شىعىپ، شابۋىل جاساعان. 

شۇعىل تۇردە بالانى قوبدا اۋدانىنداعى اۋرۋحاناعا جەتكىزىلەدى. تۇلكى بالانىڭ مۇرنى، ماڭدايى جانە قاباق تۇسىنان تىستەپ العان. سونداي-اق ونىڭ جامباسى مەن بالتىرىندا، ساماي ايماعىندا تىرناق ءىزى قالعان.

ال تۇلكىنى ءولتىرىپ، ساراپتاما جىبەرگەن. ساراپتاما ناتيجەسىندە جانۋاردان قۇتىرۋ اۋرۋىنىڭ بەلگىسى انىقتالعان. 

بالا قۇتىرماعا قارسى ەكپە الادى، پروفيلاكتيكالىق ەم 28 كۇنگە سوزىلادى. بالاعا اۋىل دارىگەرى قاراپ جاتىر.

"شارۋا شارۋاشىلىعىندا 21 كۇن كارانتين جاريالاندى، اۋىلدان مال شىعارۋعا جانە اكەلۋگە بولمايدى. ەت، ءسۇت جانە باسقا دا جانۋارلاردان الىناتىن ونىمدەردى سىرتقا شىعارۋعا بولمايدى"، - دەدى اقتوبە وبلىسىنىڭ ۆەتەريناريا باسقارماسى باسشىسىنىڭ ورىنباسارى يسا بازاروۆ.