تۇركىستاندا كامەلەتكە تولماعان 70-كە جۋىق بالاعا زاڭسىز ءدىني ساباق وتكىزگەن ازامات ۇستالدى.

تۇركىستان وبلىسى پد ەكسترەميزمگە قارسى ءىس-قيمىل باسقارماسى مەن تۇركىستان وبلىسى بويىنشا ۇلتتىق قاۋىپسىزدىك كوميتەتىنىڭ قىزمەتكەرلەرى بىرلەسىپ، جەدەل ءىس-شارالار وتكىزۋ بارىسىندا، كامەلەتكە تولماعاندارعا زاڭسىز ءدىني ساباق بەرگەن ەر ادامدى انىقتادى. ياعني، تۇركىستان قالاسىنىڭ تۇرعىنى ۇيىندە 5 جاستان 17 جاسقا دەيىنگى 68 بالاعا ساباق بەرىپ، ءدىني ۋاعىزداردى زاڭسىز وتكىزگەن، ال وقۋ اقىسى 100 مىڭ تەڭگەنى قۇراعان. كۇدىكتىنىڭ مەكەنجايى بويىنشا تەكسەرۋ جۇرگىزۋ كەزىندە 68 بالانىڭ ءدىني باعىت بويىنشا ساباق العانى راستالدى.

سونداي-اق وقۋشىلار اراسىندا تۇركىستان عانا ەمەس، اباي، شىعىس قازاقستان، جامبىل وبلىستارى مەن وزبەكستان رەسپۋبليكاسى بالالارىنىڭ دا ءبىلىم العانى انىقتالدى. وعان قوسا پوليسەيلەر جەرگىلىكتى تۇرعىننىڭ ۇيىنەن ساراپتاماعا باعىتتالعان 100-دەن اسا ءدىني سيپاتتاعى كىتاپتاردى تاركىلەدى. 

ەر ادامعا قاتىستى ق ر اقبتك-نىڭ 490-بابى 3-بولىگى («قازاقستان رەسپۋبليكاسىنىڭ ءدىني قىزمەت جانە ءدىني بىرلەستىكتەر تۋرالى زاڭناماسىن بۇزۋ») بويىنشا اكىمشىلىك حاتتاما تولتىرىلدى. تۇركىستان وبلىسىنىڭ پوليسەيلەرى ازاماتتارعا زاڭسىز ءدىني قىزمەتپەن اينالىسقانى جانە ءدىني ادەبيەتتەردى تاراتقانى ءۇشىن جاۋاپكەرشىلىك قاراستىرىلعانىن ەسكەرتەدى، – دەلىنگەن پوليسيا حابارلاماسىندا.

دەرەككوز: Halyq Uni