اقتوبەدەن قازاق سۇلتاندارىنىڭ قورىمى تابىلدى. بۇل اۋماقتا ورتاعاسىرلىق قالا بولعانى دا انىقتالىپ وتىر. بۇل تۋرالى Qazaqstan.tv ارناسى حابارلادى. 

"بۇل بەلگى 1861 جىلى قازاقتىڭ بەلگىلى سۇلتاندارىنىڭ بىرىنە قويىلعان. بۇل اۋماقتا وسىنداي ءتورت قۇلپىتاس بار. زەرتتەۋشىلەردىڭ ايتۋىنشا، جاقىن جەردە شاعىن قالاشىق تا بولعان. اقتوبە قالاسىنىڭ تاريحى 1869 جىلدان باستالمايدى، كەمىندە ودان ءبىر عاسىرعا ارىگە كەتەدى. بۇل تاريحي جاڭالىقتى تالعات جۇماعامبەتوۆ باستاعان تاريحشىلار اشتى"، – دەلىنگەن اقپاراتتا. 

قالا شەتىندەگى ەسكى قورىمدى زەرتتەۋ بارىسىندا بۇل جەرگە قازاقتىڭ ايگىلى سۇلتاندارى جەرلەنگەنى انىقتالعان. مۇندا كىشى ءجۇزدىڭ سوڭعى حانى ارىنعازىنىڭ ۇرپاقتارى جاتىر. 

قازىرگى ۋاقىتتا ءتورت قۇلپىتاس وقىلدى. ولاردىڭ ءبىرى 1848 جىلى قويىلعان. 

عالىمداردىڭ ايتۋىنشا، وسى ماڭدا ورتاعاسىرلىق ءۇش ەلدىمەكەن بولعان. مىنا قورىمعا سۇلتاندارعا دەيىن سوندا ءومىر سۇرگەن ادامدار جەرلەنگەن. وكىنىشتىسى، قورعانداردىڭ قيراندىلارى وسىدان 50-60 جىل بۇرىن بۇزىلىپ كەتكەن. عالىمداردىڭ ايتۋىنشا، ەندى اقتوبە قالاسىنىڭ قۇرىلعان ۋاقىتى كەمىندە XVII عاسىردان باستاپ ەسەپتەلۋگە ءتيىس. 
عالىمدار وسى جەردەن ورتاعاسىرلىق وبانى دا انىقتادى. بۇل تاريحي نىسانداردىڭ كەيبىرى بۇعان دەيىن دە بەلگىلى بولعانىمەن، ەشكىم دەن قويىپ زەرتتەمەگەن. سوندىقتان كەلەسى جىلى اۋقىمدى جۇمىستار جۇرگىزىلۋگە ءتيىس. سۇلتاندار جاتقان جەرگە تاريحي كەشەن سالۋ جونىندە دە ۇسىنىستار بار.